Знікненне крытыка Лукашэнкі: у Жэневе прынялі пастанову паводле справы Ганчара

Сведчанні паказваюць на дачыненне высокапастаўленых дзяржчыноўнікаў да знікнення Ганчара.

Міжпарламенцкі саюз (МПС) заклікаў улады Беларусі зрабіць усё магчымае для поўнага расследавання справы аб знікненні ў 1999 годзе апазіцыйнага дэпутата Віктара Ганчара і прыцягнення вінаватых да адказнасці.

Пра гэта гаворыцца ў пастанове Кіруючай рады МПС, прынятай у Жэневе на пазачарговай сесіі арганізацыі і апублікаванай у аўторак, 3 лістапада. Яна была ўхваленая на аснове рэкамендацый камітэта МПС у грамадзянскіх правах парламентарыяў. У канцы кастрычніка камітэт у рэжыме анлайн правёў пасяджэнне, на якім былі разгледжаны справы больш чым 300 дэпутатаў з 19 краін, у тым ліку і справа Ганчара.

Як высветліла DW, пры прыняцці Кіруючай рады Міжпарламенцкага саюза пастановы ў Жэневе прысутнічалі і тры прадстаўнікі Нацыянальнага сходу Беларусі, якія не выказалі ніякіх заўваг ці каментароў.

Паказанні Юрыя Гараўскага

У прэс-рэлізе з нагоды прынятай пастановы, між іншым, адзначаецца, што пасля праведзеных у Беларусі ў жніўні сёлета прэзідэнцкіх выбараў даўняя справа аб знікненні ў 1999 годзе апазіцыйнага дэпутата Віктара Ганчара набывае ўсё большае значэнне. Ганчар, нагадваецца ў дакуменце, знік напярэдадні падачы крытычнай інфармацыі пра тагачаснага прэзідэнта Аляксандра Лукашэнку.

Працягваючы займацца справай Ганчара, камітэт МПС у правах парламентарыяў на пасяджэнні ў канцы кастрычніка заслухаў паказанні Юрыя Гараўскага, былога байца САХРу (спецатрада хуткага рэагавання ўнутраных войскаў МУС Беларусі), які ў інтэрв'ю DW раней прызнаўся ў саўдзеле ў выкраданні і забойстве Віктара Ганчара і бізнэсоўца Анатоля Красоўскага, а таксама экс-міністра ўнутраных спраў Юрыя Захаранкі.

Як гаворыцца ў пастанове Кіруючай рады МПС, Гараўскі падаў сябрам камітэта падрабязную інфармацыю пра абставіны выкрадання і забойства Ганчара і Красоўскага, уключаючы каардынаты месца, дзе, як мяркуецца былі пахаваныя іх целы.

Кіраўнік аддзела камунікацый МПС Томас Фітцсіманс у каментары для DW падкрэсліў, што сведчанні, якія атрымаў МПС у апошні час, усё часцей паказваюць на дачыненне высокапастаўленых беларускіх дзяржчыноўнікаў да знікнення і магчымага забойства Ганчара. Недапушчальна, каб вінаватыя ў яго знікненні не былi прыцягнутыя да адказнасці, дадаў Фітцсіманс.