Сэнат ЗША прыняў Акт аб дэмакратыі ў Беларусі

Закон пашырае паўнамоцтвы прэзідэнта ЗША да ўвядзення новых санкцый супраць рэжыму Лукашэнкі.

Сэнат ЗША ўхваліў законапраект Аб суверэнітэце, правах чалавека і дэмакратыі ў Беларусі» (Belarus Democracy, Human Rights, and Sovereignty Act). Як паведамлялася раней, дакумент дае дадатковыя паўнамоцтвы прэзідэнту ЗША да ўвядзення новых санкцый у сувязі з выбарамі 2020 года Беларусі і наступнымі за імі падзеямі.

Законапраект быў прадстаўлены кангрэсмэнам Крысам Смітам. Ён з'яўляецца адным з аўтараў актаў аб дэмакратыі ў Беларусі 2004, 2006 і 2011 гадоў.

Як адзначаецца ў тлумачэнні да дакумента, тым самым пашыраюцца «паўнамоцтвы прэзідэнта ЗША да ўвядзення новых санкцый» у сувязі з выбарамі 2020 года Беларусі.

«Прэзідэнт ЗША можа ўвесці візавыя санкцыі супраць кожнага замежніка, які з'яўляецца чальцом Цэнтральнай выбарчай камісіі Беларусі ці які ўдзельнічаў у маніпуляцыях на выбарах, або ў дачыненні да ўрадавай асобы, адказнай за пераслед незалежных СМІ, альбо прадстаўніка Саюзнай дзяржавы, альбо расейскага грамадзяніна, які прымаў значны ўдзел у пераследзе СМІ, парушэнні правоў чалавека і датычны да палітычных рэпрэсій у Беларусі», - гаворыцца ў тэксце.

Акрамя таго, абноўлены Акт аб дэмакратыі ў Беларусі ўтрымлівае наступныя пункты:

прызнае Каардынацыйную раду законным інстытутам для ўдзелу ў дыялогу аб мірнай перадачы ўлады і не прызнае Аляксандра Лукашэнкі «законна абраным лідарам Беларусі»;

заклікае правесці новыя прэзідэнцкія і парламенцкія выбары ў свабоднай і справядлівай форме ў адпаведнасці са стандартамі АБСЕ;

заклікае вызваліць усіх палітычных зняволеных без усялякіх папярэдніх умоў;

падтрымлівае імкненне народа Беларусі ў свабодзе веравызнання;

дазваляе дапамогу ў прасоўванні дэмакратыі і грамадзянскай супольнасці ў Беларусі;

заяўляе, што ЗША не прызнаюць уключэння Беларусі ў Саюзную дзяржаву з Расеяй;

патрабуе ад Злучаных Штатаў стратэгіі для прасоўвання вяшчання, свабоды інтэрнэту і доступу да інфармацыі;

надае падтрымку беларускім СМІ і прадстаўнікам IT-сектара.

Раней дакумент ухваліла Палата прадстаўнікоў Кангрэсу ЗША. Зараз ён павінен паступіць на подпіс прэзідэнту.