«Прайшла мытню і затрымалася на пошце»

Беларусы перажываюць праз пасылкі, якія не паспяваюць да свята.

Да Новага года крыху больш за тыдзень, а значыць, беларусам пара трывожыцца, што іх пасылкі зноў затрымаліся. У многіх выпадках, мяркуючы па трэкінгу, затрымаліся менавіта на нашай тэрыторыі, ужо прайшоўшы мытню. Дзеля справядлівасці, доўга блукаюць некаторыя адпраўленні і да беларускай мяжы. Што адбываецца? «Онлайнер» запытаўся ў «Белпошты» пра яе зону адказнасці.

Мяркуючы з паведамленняў чытачоў на «пасылачнай» галінцы форуму, сітуацыя ў многіх падобная. Пасылка (звычайна заказ з інтэрнэт-крамы) прыходзіць у Беларусь, у большасці выпадкаў даволі хутка праходзіць мытны кантроль - і надоўга завісае паміж мытняй і паштовым аддзяленнем. Магчымыя невялікія варыяцыі.

«З 9 снежня вісіць пасылка ў стадыі «Заканчэнне мытнага кантролю», - перажываў яшчэ 17 снежня jamal. - Гэта нармальна? Вельмі патрэбная да Новага года».

Тэрмін пакуль не выглядае трагічным, чытача там суцяшаюць: можа, неўзабаве дойдзе.

«У мяне «латвійка» ўжо 17 дзён адпраўленая - і цішыня, «эстонка» - 14, «пекінка» наогул намёртва завісла, 11-га перадалі возніку - і цішыня, ужо 24 дні прайшло», - Андрэйкін наракае, што надышлі апошнія часы.

«Адпраўленая 8 снежня пасылка (прайшло 14 дзён) яшчэ нават не адзначылася ў нас, - засмучаны Pelin. - А адпраўленая 27 лістапада адзначаная ў Менску 10 снежня - і цішыня».

Тыпавую сітуацыю малюе Aaron: пасылка прайшла мытню і на некалькі дзён заліпла на стадыі «паступіла ў апрацоўку».

Гэтую пераклічку можна прадаўжаць доўга. Факт застаецца фактам: перанесці Новы год, відавочна, не атрымаецца, і некаторыя адпраўлення дайсці не паспеюць.

На прадпрыемстве «Белпошта» тлумачаць затрымкі традыцыйнай перадсвяточнай нагрузкай: плынь павялічваецца, яе хуткасць зніжаецца.

Нагадваюць, што стандартнае папярэджанне аб тым, што так адбудзецца, з'явілася на сайце арганізацыі ў пачатку лістапада. Заклікалі кліентаў дзейнічаць загадзя: «З улікам практыкі за шэраг гадоў напярэдадні навагодніх і калядных святаў плынь пошты павялічваецца да 2,5 раза. Рэкамендуем своечасова паклапаціцца аб перасылцы міжнародных і ўнутраных паштовых адпраўленняў, у тым ліку аб замовах у інтэрнэт-крамах...»

У арганізацыі дадалі, што, як звычайна ў перадсвяточны сезон, мабілізавалі для працы з пасылкамі дадатковых спецыялістаў, робяць усё магчымае, каб паскорыць дастаўку.