ЗША ўвялі санкцыі супраць Цэнтральнага банка Сірыі

Пра гэта паведамляецца на сайце Міністэрства фінансаў ЗША.

Улады ЗША ўвялі санкцыі супраць Цэнтральнага банка Сірыі. Пра гэта паведамляецца на сайце Міністэрства фінансаў ЗША.

Як тлумачыцца ў каментары ведамства, захады былі прынятыя ў сувязі з тым, што Цэнтрабанк САР «мае цесныя сувязі з Іранам і з'яўляецца неад'емнай часткай высілкаў Дамаска ў павелічэнні дзяржаўных даходаў і падтрыманні сірыйскай валюты».

Таксама абмежаванні ўводзяцца супраць дзевяці камерцыйных кампаній. Сярод іх кампаніі вытворчасці бетону, пластыка, транспартная кампанія і іншыя.

Таксама ведамства ўнесла ў чорны спіс чатырох чалавек, якія маюць падданства Вялікабрытаніі і сірыйскае грамадзянства. Сярод іх - высокапастаўленая супрацоўніца адміністрацыі прэзідэнта Сірыі Ліна аль-Кінае (Lina Mohammed Nazir al-Kinayeh) і сябра сірыйскага парламента Махамед Масуці (Mohammed Hammam Mohammed Adnan Masouti), аднак раней супраць іх уводзіліся санкцыі паводле іншых артыкулаў.

У канцы ліпеня ЗША абвясцілі пра пашырэнне санкцый супраць Сірыі. У спіс фізічных асоб, якім забаронены ўезд у Злучаныя Штаты, увайшлі сын прэзідэнта Сірыі Хафез Асад і яго стрыечны брат Зухаір Таўфік Асад.

У верасні ЗША ўвялі санкцыі супраць шэрагу грамадзян Сірыі і 13 сірыйскіх арганізацый, у тым ліку Міністэрства турызму. Тады пад санкцыі таксама патрапілі некалькі турыстычных і будаўнічых кампаній. У чорны спіс унесены шэсць грамадзян Сірыі - жыхары Дамаска, Тартуса і Латакіі. Сярод іх камандуючы пятым корпусам сірыйскай арміі Мілад Джадзід.