Лінас Лінкявічус: Беларусы і літоўцы маюць агульную гісторыю
1- 4.02.2020, 20:10
- 11,303
Перапахаванне паўстанцаў Каліноўскага гэта пацвердзіла.
Прадстаўнікі беларускай інтэлігенцыі прасілі перазахаваць у Менску частку парэшткаў паўстанцаў 1863 года ў Менску. І літоўскі бок ім адмовіў, бо такая працэдура прадугледжаная толькі для парэшткаў святых. Пра гэта на сустрэчы з беларускімі журналістамі распавёў кіраўнік МЗС Літвы Лінас Лінкявічус, паведамляе euroradio.fm.
Перапахаванне Кастуся Каліноўскага і яго паплечнікаў прайшло ў Вільні 22 лістапада 2019 года. Перад тым, у верасні, беларуская інтэлігенцыя напісала зварот да літоўскага парламенту з просьбай перапахаваць астанкі ў Беларусі. Пад адкрытым лістом падпісаліся нобелеўская лаўрэатка Святлана Алексіевіч, рок-музыка Лявон Вольскі, пісьменнік Уладзімір Арлоў і яшчэ звыш чатырох тысяч чалавек.
Са слоў Лінкявічуса, афіцыйнага звароту пра перапахаванне парэшткаў не было.
«Наколькі я ведаю, гаворка ішла пра перапахаванне часткі парэшткаў. Але эксперты сказалі, што так бывае толькі са святымі. Я не экспэрт, не ведаю, але ў фінале знайшлі агульнае разуменне, што трэба перапахаваць так, як атрымалася цяпер», - удакладніў ён .
Лінкявічус падкрэсліў, што беларусы і літоўцы маюць агульную гісторыю, і пахаванне паўстанцаў Каліноўскага гэта пацвердзіла. Пры гэтым ён дадаў, што Літва не манапалізуе гісторыю Вялікага княства Літоўскага і спадзяецца на такое ж стаўленне з боку Беларусі.
Журналісты папрасілі літоўскага дыпламата пракаментаваць расейскія Telegram-каналы, якія распаўсюджваюць чуткі аб магчымым аб'яднанні Беларусі і Літвы ў новае ВКЛ. На думку Лінкявічуса, такое адраджэнне ВКЛ немагчымае.
Што да так званага «Балта-Чарнаморскага саюза», то Літва зацікаўлена ў такім супрацоўніцтве. Але гэта будзе менавіта супрацоўніцтва некалькіх дзяржаў, а не стварэнне адзінай дзяржавы.