У Менску ўвядуць новы спосаб аплаты за праезд у маршрутках?

Пра новаўвядзенні распавёў дырэктар ГП «Сталічны транспарт і сувязь».

Тэхналогію аплаты праезду ў маршрутных таксі з дапамогай смартфона хочуць прапанаваць у Менску. Пра гэта падчас правядзення жывой лініі карэспандэнту агенцтва «Мінск-Навіны» распавёў дырэктар ГП «Сталічны транспарт і сувязь» Валер Шкуратаў.

- Сёння ў маршрутках пасажыры могуць разлічыцца за паездкі толькі гатоўкай, што не кожнаму зручна. Мы хочам прапрацаваць безнаяўны варыянт аплаты, які прымуць і пасажыры, і прыватны бізнэс. Спыніліся пакуль на смартфоне. Але магчымасць аплаціць праезд гатоўкай таксама застанецца. Паспрабуем ажыццявіць гэтыя планы такім чынам, каб перавозчыкам не давялося выдаткоўваць грошы на дадатковае абсталяванне.

Са слоў Шкуратава, найбліжэйшы час у СТС абмяркуюць гэтую тэму разам з перавозчыкамі і распрацоўшчыкамі, каб разгледзець тэхнічныя і юрыдычныя аспекты, адпаведнасць падатковаму заканадаўству. На сустрэчу плануецца запрасіць таксама спецыялістаў, якія змогуць даць тлумачэнні ў гэтых пытаннях. Дарэчы, адзначыў дырэктар, у Берасці амаль год таму быў запушчаны пілотны праект аб аплаце праезду праз мабільны дадатак на смартфоне ва ўсім грамадскім транспарце.

Неўзабаве, нагадаў кіраўнік прадпрыемства, у Менску пачне функцыянаваць і мабільны дадатак з раскладам і часам прыбыцця сталічных маршрутак.

Такі сэрвіс - рэч карысная, праўда, з яе дапамогай немагчыма вызначыць, ці пад'едзе аўтамабіль да тваёй прыпынку ці не. На жывую лінію, напрыклад, патэлефанаваў Уладзімір Уладзіміравіч і паскардзіўся, што 5 лютага на досвітку блізу гадзіны чакаў маршрутку №1547. Два аўтамабілі прайшлі па 2-й паласе, не спыняючыся, бо былі запоўненыя. Пасажыр змог увайсці толькі ў трэцюю, дзе таксама было поўна людзей, акрамя таго, кіроўца не выдаваў квіткі.

- Праверым маршрут. Калі факты пацвердзяцца, прымем меры, - запэўніў Шкуратаў. - З іншага боку, гэты маршрут вельмі папулярны ў пасажыраў: за 1,2 рубля яны могуць даехаць з Калодзішчаў да вул. Каржанеўскага. Экспрэсныя аўтобусы курсуюць па ім з інтэрвалам 5-7 хвілін, куды ўжо часцей...