Літва арганізавала для беларусаў гуманітарны калідор на мяжы
- 21.03.2020, 21:13
- 9,729
У пэўных пунктах пропуску мяжу можна перасячы пешшу.
Грамадзяне Беларусі, якія знаходзяцца ў гэты момант у Літве, могуць вярнуцца дадому, скарыстаўшыся транзітным гуманітарным калідорам да нуля гадзінаў паводле літоўскага часу 23 сакавіка, паведамляюць naviny.by са спасылкай на Дзяржпамежкамітэт.
Да пазначанага часу перасячы мяжу можна ў пешым парадку ў пунктах пропуску «Мядзінінкай» – «Каменны Лог», «Шальчынінкай» – «Беняконі» і «Райгардас» – «Прывалка».
Аналагічна ў пешым парадку праз пэўныя пункты пропуску могуць вярнуцца дадому беларускія грамадзяне, якія цяпер знаходзяцца ў Латвіі і Польшчы.
Экстраную дапамогу з выездам і неабходную кансультацыю можна атрымаць у консульскіх установах Беларусі ў названых дзяржавах, падкрэслілі ў Дзяржпамежкамітэце.