Беларусы падтрымалі першага галоўнага лекара, які заклікаў заставацца дома
29- 22.03.2020, 11:51
- 60,977
![Беларусы падтрымалі першага галоўнага лекара, які заклікаў заставацца дома](https://i.c97.org/ai/370335/aux-head-1584867106-20200322_sotrudnik_vracza_360.jpg)
Супрацоўнікі Максіма Ачарэтнага далучаюцца да ягонай ініцыятывы.
За ноч з 21 на 22 сакавіка пост галоўнага лекара 3-й гарадской дзіцячай клінічнай лякарні Менска Максіма Ачарэтнага, які заклікаў людзей заставацца дома, сабраў блізу 800 перапостаў.
«Усё ўжо так небяспечна?» – спыталі лекара падпісчыкі.
– Усё незразумела. Таму трэба дзейнічаць паводле найгоршага сцэнара. Італія нам адмоўны прыклад, – растлумачыў Максім Ачарэтны.
![](https://i.c97.org/ai/370335/aux-1584866928-1.jpg)
У каментарах людзі дзякуюць лекару за сумленнасць, піша gazetaby.com.
«Ці ёсць у мяне аўтарытэты ў свеце фэйку і панікі? Вельмі мала. Але калі галоўны лекар 3-й дзіцячай лякарні, раней – загадчык рэанімацыі дзіцячай інфекцыйкі, Максім Ачарэтны, кажа: “Будзьце, калі ласка, дома”, то я веру, што гэта важна, – напісала Аксана Косцікава. – Я бачыла, як мамы з цяжка хворымі дзецьмі без інфекцый спрабавалі “патрапіць да Ачарэтнага”, таму што ён уратуе (часы працы ў інфекцыйцы).
Я ведаю, што Максім Ачарэтны адзін з нямногіх педыятраў, хто выступае за прысутнасць бацькоў у дзіцячых рэанімацыях. І за ўсё бязмерна паважаю.
Я не вельмі баюся каранавірусу. Нібыта не так каб у групе рызыкі. І дзеці таксама. Бацькі, на жаль, далёка. І ад маёй сацыяльнай актыўнасці іх жыццё не залежыць.
Але я баюся за лекараў. Што прымушае сціскацца сэрца, дык гэта апісанне трэшу, у якім жывуць цяпер лекары ў Італіі, Гішпаніі, Іране і інш.
Мяне просяць скараціць сваю сацыяльную актыўнасць, і, магчыма, дзякуючы гэтаму лекар не будзе жыць на працы, апранаць памперс (так, так, кітайскія лекары так рабілі, каб лішні раз не здымаць абарону і не адрывацца ад працы), не будзе рызыкаваць заразіцца ў бясконцай плыні пацыентаў. Хіба гэта супамерныя рэчы? Хіба гэта складана?
І, так, пакуль я ўпэўненая, што ў нас умоўна спакойна. Хай нашы лекары (і ўвесь медперсанал) прадаўжае кожны дзень вяртацца дадому».
![](https://i.c97.org/ai/370335/aux-1584866928-2.jpg)
Максіма Ачарэтнага падтрымала супрацоўніца 3-й гарадской дзіцячай клінічнай лякарні Ірына Тарасюк, якая раніцай 22 сакавіка размесціла ў Фэйсбуку пост з заклікам заставацца дома.