У Жыткавічах выявілі з каранавірусам жанчыну, якая не была за мяжой

Гэта другі выпадак у Гомельскай вобласці.

Пацверджаны другі выпадак захворвання на каранавірус COVID-19 у Гомельскай вобласці, паведамляе gomel.today. Як стала вядома, хваробу выявілі ў жыхаркі райцэнтра Жыткавічаў.

Паводле наяўнай інфармацыі, жанчына 1961 года нараджэння звярнулася па дапамогу з пнеўманіяй, узяты мазок паказаў станоўчы вынік у суботу, 21 сакавіка. Захварэлая накіраваная ў Гомель, бо ў яе зафіксаванае двухбаковае запаленне лёгкіх. Лячэнне праходзіць у Гомельскай абласной туберкулёзнай клінічнай лякарні.

Вядома, што захварэлая на каранавірус жанчына нікуды за межы раёна ўжо вельмі даўно не выязджала. Таму крыніца інфекцыі застаецца загадкай. Кантактамі першага ўзроўню выявіліся ў асноўным мясцовыя лекары і, мяркуючы з паведамленняў у сацсетках, якія з'явіліся ў пабліках Жыткавічаў, у мясцовай лякарні ўжо пачаў мяняцца графік прыёму лекараў. Відавочна, гэта адбываецца з прычыны таго, што медыкі, якія кантактавалі з захварэлай, будуць адпраўленыя пад назіранне.

Як вірус мог трапіць у такі аддалены і ізаляваны раён, як Жыткавіцкі, ды яшчэ і з улікам таго, што захварэлая жанчына яго не пакідала - пытанне з многімі невядомымі.

Нагадаем, да сённяшняга дня было вядома аб адзіным выпадку захворвання COVID-19 у Гомельскай вобласці - 20-гадовы спартовец «прывёз» вірус з Партугаліі. Ва ўсёй краіне 81 пацверджаны выпадак.