Герашчанка: Савецкая ўлада, з якой родам Лукашэнка, таксама баялася сказаць уласнаму народу пра Чарнобыль

Намеснік міністра МУС Украіны распавёў, чаму дыктатар Беларусі не абвяшчае карантын.

Не пазней за аўторак, 24 сакавіка, Аляксандр Лукашэнка ўвядзе ў Беларусі карантын у сувязі з каранавірусам. Такое меркаванне выказаў намеснік міністра ўнутраных спраў Украіны Антон Герашчанка ў інтэрв'ю Дзмітрыю Гардону.

Нежаданне Лукашэнкі абвяшчаць карантын Герашчанка патлумачыў так: «Савецкая ўлада, родам з якой спадар Лукашэнка, яна таксама, калі адбыўся выбух Чарнобыльскай атамнай электрастанцыі, тыдзень баялася сказаць ўласнаму народу, што ў нас адбылася найбуйнейшая ў свеце ядзерная катастрофа».

«Проста ён не хоча дапусціць, напэўна, панікі або хоча паказаць, што ён асаблівы», - выказаў меркаванне ўкраінскі чыноўнік.

Герашчанка заявіў, што гатовы спрачацца «на бутэльку каньяку», што «праз некалькі дзён Лукашэнка ўвядзе ў сябе вельмі жорсткі карантын», «не далей, чым у аўторак», 24 сакавіка.

Дыктатар шматкроць падкрэсліваў, што не падзяляе панічныя настроі ў свеце з нагоды каранавірусу. «Я каранавірус гэты называю няйначай як псіхозам і ад гэтага ніколі не адмоўлюся, бо разам з вамі перажыў шматлікія ўжо псіхозы, і мы ведаем, да чаго гэта прыводзіла, - заявіў ён 19 сакавіка на нарадзе аб эпідэміялагічнай сітуацыі. - Перакананы, што мы можам больш пацярпець ад панікі, чым ад самога віруса. Вось гэта мяне больш за ўсё хвалюе».