Нафтавая вайна: Расея саступіла сама сабе

Крэмль вымушаны адмаўляцца ад уласных планаў.

Расея не спяшаецца выконваць абяцанне павялічыць здабычу нафты, пра якое абвясціла праз некалькі дзён пасля раскідання пагаднення OPEC+, піша finanz.ru.

Па выніках нарады ў Мінэнэрга, куды былі ў панядзелак запрошаны кіраўнікі буйных нафтавых кампаній, пастановы аб нарошчванні здабычы з 1 красавіка прынята не было, распавяла «Інтэрфаксу» крыніца, знаёмая з сітуацыяй.

Хоць два тыдні таму кіраўнік установы Аляксандр Новак казаў пра намер дадаць на рынак 250 тысяч барэляў штодзённых паставак, а пасля нарасціць вытворчасць на 500 тысяч барэляў за дзень, сітуацыя на рынку горшая за самыя змрочныя чаканні.

Сэнсу нарошчваць здабычу пры спадзе попыту няма, тлумачыць крыніца «Інтэрфакса». Пакуль прынятая пастанова «трымаць руку на пульсе» і праводзіць рэгулярныя сустрэчы для ацэнкі сітуацыі, дадае ён.

На мінулым тыдні ў нафтатрэйдэраў у Еўропе пачалі ўзнікаць складанасці з продажам расейскай нафты Urals пасля таго, як Савудаўская Арабія абвясціла аб планах павярнуць вентылі на радовішчах-гігантах на мяжы з Кувейтам, патроіць пастаўкі ў Еўразвяз і прапанавала кліентам красавіцкія партыі са зніжкай на 10 даляраў да кошту Brent.

Як пісаў Reuters, шэсць тэндараў на пастаўку Urals, якія праводзілі Trafigura і Glencore, а таксама гандлёвы «дочкі» брытанскай Shell і французскай Total скончыліся без угод: пакупнікоў не знайшлося.

У панядзелак, 23 сакавіка, Сургутнафтагазу атрымалася прадаць 100 тысяч тон нафты з адгрузкай з Прыморска 8-9 красавіка і такі ж аб'ём з пастаўкай з Усць-Лугі кітайскай Unipec.

Цана барэля Urals паднялася да 20,08 даляра, тады як на мінулым тыдні падала да 18,6 даляра - мінімуму з 2002 года.

Савудаўская Арабія, якая абвясціла пра планы давесці здабычу да 12 млн барэляў за дзень, а экспарт - да 10 млн, пакуль таксама фактычнага росту паставак не паказала, паведамілі Reuters дзве крыніцы ў галіне.

«Савудаўскі экспарт у сакавіку пакуль складае 7,3 млн барэляў за дзень, не болей, - сказала адная з крыніц. - Агульны аб'ём паставак значна ніжэйшы за 10 мільёнаў барэляў за дзень».

Звесткі пра танкерныя перавозкі з Refintiv Eikon паказваюць на яшчэ меншы аб'ём экспарту - крыху ніжэй за 7 млн барэляў за дзень з пачатку сакавіка.

Праз абмежаванні транспартнага перамяшчэння, якое закранула некалькіх соцень мільёнаў людзей па свеце, сусветны попыт на нафту можа ўпасці на 10% у другім квартале, што можа прывесці да лішку на 10 млн барэляў за дзень, калі OPEC+ наросціць здабычу, адзначае аналітык Rystad Energy Арцём Чэн.

«Фактычна ў другім квартале трэба будзе прыбудаваць у сховішчы прыкладна 1 мільярд дадатковых барэляў, але ў кароткія тэрміны месца для такіх аб'ёмаў не знайсці, што прывядзе да браку ёмістасцяў і яшчэ большага ціску на кошты», - разважае ён.

Цяпер дзённая здабыча нафты перавышае попыт, паводле розных ацэнках, ад 5 да 10 млн барэляў за дзень, у красавіку гэтая лічба можа вырасці яшчэ на 5 млн барэляў за дзень да самай вялікай розніцы паміж попытам і прапановай у гісторыі, кажа аддзела стратэгій на таварна-сыравінным рынку Saxo Bank Оле Хансэн.

Пры такім дысбалансе кошт можа ўпасці ніжэй за аперацыйныя выдаткі дзейных радовішчаў, папярэджвае Чэн: «У некаторых рэгіёнах мы, магчыма, на вельмі кароткі перыяд убачым адмоўныя кошты нафты. Упершыню за шмат гадоў будуць спыненыя ўжо эксплуатаваныя радовішчы, пачне скарачацца здабыча сланцавай нафты і рынак адкарэктуе прапанову. Іншага варыянту цяпер не бачыцца».