«Згубілі тэст на каранавірус, запэўнівалі, што здаровая»
12- 24.03.2020, 10:21
- 41,409
![«Згубілі тэст на каранавірус, запэўнівалі, што здаровая»](https://i.c97.org/ai/370559/aux-head-1585034362-202020324_nastia-t.jpg)
Беларускую блогерку дзевяць дзён пераконвалі, што тэст адмоўны.
Рэйс Прага - Менск 14 сакавіка Насця Захарэвіч запомніць надоўга. З цяжарам у лёгкіх і тэмпературай 37,2 яна вярталася на радзіму з Чэхіі, дзе на той момант ужо абвясцілі надзвычайнае становішча. Зрабіла экспрэс-тэст і да сённяшняга дня існавала легенда, што ён адмоўны, а хвароба, з якой не можа выйсці, называецца грып, паведамляе «Белсат».
Згубілі вынік тэсту
Паўторны тэст на «Ковід-19» у арганізме 26-гадовай Настассі Захарэвіч меліся зрабіць 26 сакавіка ў Гарадскім клінічным скурна-венералагічным дыспансеры, дзе яна застаецца сярод іншых шпіталізаваных «кантактаў другога ўзроўню».
«Мой мазок ад 14 сакавіка, які быў зроблены ў аэрапорце, згубіўся. Толькі што ўзялі новы. Гэта азначае, што не выключаецца магчымасць заражэння каранавірусам, і што я магла заражаць іншых увесь гэты час», – паведаміла збянтэжаная дзяўчына.
Шмат хто з «суседзяў» Насты ў дыспансеры не мае трывожных сімптомаў. Гісторыя падобная: не так даўно былі за мяжою, па прыездзе звярнуліся да дактароў і трапілі ў шпіталь. Паводле новых эпідэміялагічных правілаў, дадому яны вернуцца, калі вынікі мазку на каранавірус будуць адмоўныя. Насту ж шпіталізавалі 19 сакавіка і не сталі спяшацца з паўторам тэсту – пацыентка сказала, што мазок бралі пяць дзён таму ў аэрапорце і не пацвердзілі наяўнасці каранавіруса ў арганізме. Дыспансер даслаў запыт у аэрапорт, а там не пацвердзілі наяўнасці аналізу Насты Захарэвіч.
![](https://i.c97.org/gi/56432/288573-1585034318-big.jpg)
«Хочацца крычаць, плакаць і кідаць рэчы! Чаму ўсё так неахайна робіцца? Страшная справа», – кажа Наста.
З ейнага аповеду вынікае, што небяспека захварэць на які-кольвечы вірус была высокая – імунітэт быў аслаблены праз грып, перанесены напярэдадні паездкі ў Чэхію 9 сакавіка. На чацвёрты дзень візіту ў Прагу Наста адчула сімптомы, якіх цяпер пазбягае ўвесь свет: сухі моцны кашаль, тэмпература і галоўнае – цяжар у лёгкіх. Акурат гэтага дня ў Чэхіі абвесцілі надзвычайнае становішча ў звязку з распаўсюдам каранавіруса.
Звычайнае становішча і непахісны пратакол
У міжнародным Менскім аэрапорце 14 сакавіка рэйс Насты сустрэлі супрацоўнікі ў форме і масках. «Але тэмпературу пасажырам рэйсу не правяралі, дэзынфекавання не праводзілі ды не вылучалі з натоўпу людзей з хваравітым, як быў у Насты, станам, і як тое зазначана на старонцы Нацыянальнага аэрапорту. У той жа час прыбыў рэйс з нейкай краіны, якую занеслі ў спіс небяспечных. Тых пасажыраў апытвалі, якія яны наведвалі краіны ды выбарачна накіроўвалі на тэст на каранавірус», – згадвае Наста. У чаргу на мазок беларуска трапіла на ўласную просьбу.
![](https://i.c97.org/gi/56432/288572-1585034317-big.jpg)
У чаканні вынікаў тэсту Наста Захарэвіч прыняла рашэнне самаізалявацца. У санслужбе аэрапорту праз тэлефон дзяўчыну запэўнілі: «Калі з вамі не звязаліся, то аналіз на каранавірус адмоўны. З дрэнным самаадчуваннем звярніцеся ў паліклініку, каб даслалі ўчастковага тэрапеўта дадому».
Участковага неахвотна выслалі. Той пацвердзіў адсутнасць пнеўманіі, але і адкрыў непрыемную праўду: забор біялагічных аналізаў па-за медустановаю не робяць. Хоць у загадзе Мінздароўя № 296 ад 17 сакавіка «Аб мерах арганізацыі аказання медычнай дапамогі пацыентам з прыкметамі рэспіраторнай інфекцыі і прыняцці дадатковых супрацьэпідэмічных мераў у арганізацыі аховы здароўя», у пункце 8.1 дадатку 4 прапісана: «Арганізаваць у хатніх умовах забор біялагічнага матэрыялу для планавых лабараторных даследаванняў».
«Падзякуй» за тэст
У панядзелак 16 сакавіка Наста даведалася, што некаторыя людзі з яе рэйсу ўсё ж атрымалі медычнае назіранне ў паліклініках: з імі трымаюць сувязь, цікавяцца станам здароўя, а праз два тыдні маюць зрабіць паўторны тэст на каранавірус.
«Гэта памылка ў сістэме. Кагосьці з рэйсу назіраюць, кагосьці – не. Давялося зноў звярнуцца ў санслужбу аэрапорту, дзе запэўнілі – усе звесткі перадалі ў санстанцыю, а тая мелася паінфармаваць адпаведную паліклініку. Але ў паліклініцы развялі рукамі», – распавядае Наста. Узброеная градуснікам мянчанка наступныя два дні правяла ў перамовах з санстанцыяй, дзе ў выніку атрымала адказ: «За тэст на каранавірус варта падзякаваць, бо пасажырам з Чэхіі на момант прыбыцця (14 сакавіка) не мусілі яго рабіць. А тыя асобы, якія трапілі на ўлік у паліклініках, трапілі насуперак існаму пратаколу».
У спіс краін, небяспечных у кантэксце распаўсюду каранавіруса, Чэхія трапіла праз два дні. Пасажырка рэйсу Прага – Менск непакоіцца пра ўласнае здароўе і мае падсвядомы, як яна кажа, недавер да інфармацыі аб першым мазку на «Ковід-19». Таму 19 сакавіка яна звярнулася на гарачую лінію Міністэрства аховы здароўя, дзе прасіла зрабіць выключэнне і ўзяць яе пад нагляд у паліклініцы. Потым яшчэ адзін візіт тэрапеўта, мацнейшыя антыбіётыкі, пагаршэнне стану здароўя і чарговы званок у хуткую дапамогу.
Вынікаў аналізу на новы штам каранавіруса Наста будзе чакаць у той жа палаце – сярод асоб без прыкмет рэспіраторнага захворвання і персаналу, працу якога ацэньвае як надзвычай сумленную.