У Італіі за дзень ад каронавіруса памерла амаль 750 чалавек
8- 24.03.2020, 21:36
- 19,781
![У Італіі за дзень ад каронавіруса памерла амаль 750 чалавек](https://i.c97.org/ai/369224/aux-head-1584093899-202020313_korona_italia_t.jpg)
Паводле стану на 24 сакавіка колькасць загінулых у Італіі перавысіла 6,8 тысяч чалавек.
У Італіі за мінулыя дні ад каронавіруснай інфекцыі COVID-19 памерлі 743 чалавекі, паведамляецца на сайце міністэрства аховы здароўя краіны.
Такім чынам, агульная колькасць загінулых на вечар 24 сакавіка складае 6820 чалавек, паведамляе gordonua.com.
У больш за 54 тысяч пацыентаў хвароба ў актыўнай фазе, 8326 - выпісаныя са шпіталяў пасля выздараўлення. Агульная колькасць пацверджаных выпадкаў, уключаючы ачунялых і памерлых, складае 69 176 чалавек (5249 у параўнанні з учарашнім днём).
Успышка каронавіруснай інфекцыі COVID-19 пачалася ў снежні 2019 года ў кітайскай Ухані. 11 сакавіка Сусветная арганізацыя аховы здароўя абвясціла распаўсюджванне каронавіруса пандэміяй. Паводле звестак амерыканскага Універсітэта Джонса Хопкінса на 24 сакавіка, агульная колькасць інфіцыраваных у свеце складае больш за 390 тысяч, памерла больш за 17 тысяч чалавек.
Нягледзячы на тое, што з 11 сакавіка ў Італіі дзейнічаюць строгія каранцінныя захады, краіна займае першае месца ў свеце па тэмпах распаўсюджвання каронавіруса, першае месца па колькасці памерлых і другое месца па колькасці заражаных пасля Кітая.