Названая яшчэ адна магчымая прыкмета каранавірусу

Медыкі спасылаюцца на вынікі двух апошніх даследаванняў кітайскіх лекараў.

Кан'юктывіт можа быць адной з прыкметаў заражэння каранавіруснай інфекцыяй у некаторых людзей, папярэджвае на сваім сайце Амерыканская акадэмія афтальмалогіі, піша ru.delfi.lt.

Медыкі спасылаюцца на вынікі двух апошніх даследаванняў кітайскіх лекараў.

У ходзе аднаго з іх вірусны кан'юктывіт быў знойдзены ў аднаго з 30 пацыентаў з COVID-19.

Другое даследаванне абвяшчае, што з 1099 пацыентаў з каранавірусам у Кітаі кан'юктывіт выявілі ў дзевяці.

Звесткі былі сабраныя з 30 лякарняў па ўсёй краіне. У сувязі з гэтым амерыканскія афтальмолагі параілі лекарам пры доглядзе за хворымі з падазрэннем на каранавірус насіць не толькі рэспіратар, але і ахоўныя акуляры.

Яшчэ незвычайная прыкмета заражэння каранавірусам, выяўленая навукоўцамі раней, поўная (анасмія) або частковая (гіпасмія) страта нюху. Заражаныя COVID-19 могуць перастаць адчуваць смак ежы і адрозніваць пахі.

Сярэдні інкубацыйны перыяд захворвання складае пяць дзён, пры гэтым сам вірус вельмі жывучы: ён можа знаходзіцца ў дыхальных шляхах чалавека 37 дзён, гэта значыць нашмат больш за два тыдні, якія звычайна цяпер адводзяцца па ўсім свеце на карантын.

Каранавірусы перадаюцца ад чалавека да чалавека паветрана-кропельным шляхам, а таксама могуць распаўсюджвацца, калі інфікаваны чалавек дакранаецца любой паверхні.

Людзі заражаюцца, чапаючы бруднымі рукамі рот, нос або вочы. У паветры COVID-19 жыццяздольны цягам трох гадзінаў, а на розных паверхнях – да трох сутак.

У той самы час няма доказаў перадачы COVID-19 праз ежу і ўпакоўку імпартаваных тавараў. Найбольш распаўсюджаныя сімптомы новага каранавірусу – падвышаная тэмпература, сухі кашаль, дыхавіца, цяжар у грудзях, абцяжаранае дыханне, на ранніх стадыях можа ўзнікаць дыярэя.

COVID-19 таксама можа працякаць бессімптомна.