«Глядзім на Беларусь і дзівімся, увесь свет на карантыне, а мы на трактары»

Гародзенкі з ЗША распавялі, як за акіянам перажываюць пандэмію.

Гарадзенкі Каця Гнядкова, Дар'я Матэюк і Людміла Лебедзь цяпер жывуць і працуюць у ЗША. На 29 сакавіка ў гэтай краіне выяўлены 123 750 выпадкі заражэння і 2 227 смярцей ад каранавіруса. Для hrodna.life дзяўчаты распавялі, як змянілася іх жыццё падчас пандэміі і як здалёку бачыцца сітуацыю ў Беларусі.

Каця Гнядкова з Фларыды: Disneyland закрыты, вітаміны ў дэфіцыце

Каця жыве ў Арланда і працуе ў турыстычнай індустрыі. Штат Фларыда - цэнтр тэматычных паркаў, такіх як Disney, Universal & Seaworld. Звычайна тут шмат турыстаў, усё круціцца і круціцца, але цяпер свет як-быццам спыніўся.

«На дарогах вельмі пуста, большасць крам закрытыя або працуюць паводле скарочанага графіку. Рэстарацыі працуюць выключна на вынас і дастаўку дадому. Кінатэатры, канцэртныя залы, фітнэс-цэнтры закрытыя зусім. Паркі Disney і Universal закрыліся яшчэ ў сакавіку", - распавядае Каця.

У горадзе ўведзены карантын і каменданцкая гадзіна. Выходзiць з дому можна толькі па прадукты ці ў аптэку. На працу ходзяць толькі тыя, без каго гораду не выжыць - медыкі, паліцыянты, супрацоўнікі тэхнічных і экстраных службаў.

Са слоў Каці, у крамах раскупілі туалетную паперу і дэзінфектары. У аптэках ёсць складанасці з купляй некаторых лекаў, а вітаміны сталі дэфіцытам.

Кампанія, дзе працуе Каця, спачатку перавяла ўсіх супрацоўнікаў на працу дома, а праз два тыдні адправіла амаль 2 000 чалавек у вымушаны адпачынак да чэрвеня.

Кампенсацый ад працадаўцы няма - турызм зазнае страты. Але прэзідэнт Трамп абяцае выдаць усім, хто застаўся без працы, па 1 000 даляраў, а ў навінах кажуць аб дзяржаўнай дапамозе па 600 даляраў на тыдзень для тых, хто сышоў у вымушаныя адпачынкі.

«Людзі рэагуюць па-рознаму, але на вуліцах ніхто не збіраецца, усе пазбягаюць груп і трымаюць дыстанцыю ў крамах. У шпіталях перагруз і не стае набораў для тэставання. Калі чалавек не ў надта цяжкім стане і да 50 гадоў, то адпраўляюць лячыцца дома. У мяне ёсць знаёмая, якая перанесла гэты вірус. З ёй так і было»

Усяго ў Фларыдзе выяўлена 4 038 выпадкаў заражэння і 56 смяротных зыходаў ад каранавірусу. «Толькі ў маёй акрузе - 160 заражаных, нават у комплексе, дзе я жыву двое, - кажа Каця. - Але гэта нішто ў параўнанні з Нью-Ёркам. Мабыць, вірусу цяжка выжываць у фларыдскай спякоце».

Дар'я Мацяюк, штат Масачусэтс: навучанне праз Zoom і пустыя "расейскія" крамы

Дар'я жыве ў прыгарадзе Бостана, у горадзе Ньютан. Яна студэнтка, а яшчэ працуе мадэллю.

Дар'я адзначае прыкметы новага часу гораду: Starbucks закрыўся, крамы адзення не працуюць, нельга заходзіць у бары і рэстарацыі, можна толькі замовіць ежу.

«Маё жыццё змянілася, бо я не хаджу ва ўніверсітэт. Тры тыдні таму нас перавялі на онлайн навучанне. Займаемся з дому праз дадатак Zoom - слухаем лекцыі, робім прэзентацыі, праходзім практычныя заняткі, усё сапраўды гэтак жа».

Дар'я кажа, што ў асноўным «сядзіць дома і нікуды не выходзіць» і што цяпер шмат хто паводзіць сябе гэтак жа. «У нас рэкамендуецца выходзіць з дому толькі на працу і каб падыхаць паветрам. Штрафаў за выхад на двор няма».

Дар'я распавяла, што ў краіне перанеслі тэрмін выплаты падаткаў з сакавіка на чэрвень, перасталі налічваць адсоткі на крэдыты і плануюць перанесці тэрміны аплаты здымнага жылля «на потым».

«У крамы я не хаджу, туды ходзіць мой хлопец. Прадукты ёсць, чэргі невялікія. А ў расейскай краме днямі наогул пуста было. Панікі няма, проста людзі дома сядзяць».

Усяго ў штаце Масачусэтс на 29 сакавіка зарэгістравана 4 257 выпадкаў заражэння і 44 смяротныя зыходы.

Людміла Лебедзь, штат Індыяна: людзі купляюць прадукты і зброю, але без панікі

Людміла жыве ў Порт-Вейн і працуе ў IT-сферы.

«Цяпер усе працуюць дыстанцыйна, але нам не звыкаць», - распавядае яна.

Галоўная змена ў жыцці сям'і - тое, што сын ужо тры тыдні не ходзіць у школу. Усе навучальныя ўстановы пераведзены на онлайн-навучанне.

Яшчэ яны «закупіліся» прадуктамі адразу прыкладна на два тыдні, каб радзей хадзіць у краму.

«Скасаваныя ўсе мерапрыемствы, закрытыя грамадскія месцы. Электронную пошту завальваюць мэйлы аб Covid-19. Выйшла рэкамендацыя выходзіць толькі ў патрэбу, шпацыраваць адным і захоўваць дыстанцыю», - дзеліцца жанчына.

Са слоў Людмілы, бізнэс зрэагаваў на эпідэмію раней, чым дзяржава. Прадпрыемствы ўласнымі пастановамі пачалі прымаць захады супраць распаўсюджвання інфекцыі.

«Спачатку людзі ў Амерыцы таксама не хацелі сур'ёзна ўспрымаць сітуацыю. Але, потым на дзяржаўным узроўні ўвялі карантын. Агулам, пакуль людзі паводзяць сябе спакойна: прадукты купляюць, зброю купляюць, але без панікі, - кажа яна.

Сітуацыя на радзіме, са слоў Людмілы, выглядае здалёку незразумелай:

«Глядзім на Беларусь і дзівімся. Увесь свет на карантыне, а мы на трактары».