Памёр старшыня Асацыяцыі беларускіх банкаў Аляксандр Кучынскі

Яму было 45 гадоў.

Раптоўна памёр старшыня Асацыяцыі беларускіх банкаў Аляксандр Кучынскі, паведамілі агенцтву "Інтэрфакс-Захад" у асацыяцыі. Яму было 45 гадоў.

"Аб даце і часе пахавання будзе паведамлена дадаткова", - адзначылі ў асацыяцыі.

Аляксандр Кучынскі нарадзіўся ў 1975 годзе ў Кобрыне (Берасцейская вобласць). Пасля заканчэння юрыдычнага факультэта Беларускага дзяржаўнага ўніверсітэта ў 1997 годзе пачаў сваю працоўную дзейнасць у Асацыяцыі беларускіх банкаў, дзе прапрацаваў больш за 20 гадоў на розных пасадах - ад юрысконсульта да намесніка старшыні. У 2017 годзе ўзначаліў асацыяцыю.

З'яўляўся чальцом кансультатыўнага камітэта фінансавых рынкаў пры калегіі Еўразійскай эканамічнай камісіі, галіновай рады ў працоўных і сацыяльных пытаннях.