Le Point: Масква нязменна саступае ў нафтавай вайне

Калі б Расея прыйшла да пагаднення з Савудаўскай Арабіяй, то не пралічылася б у фінансах.

«Паміж Савудаўскай Арабіяй і Расеяй ужо існавала пагадненне аб супольным скарачэнні аб'ёмаў здабычы нафты ў рамках OPEC+. Але Эр-Рыяд разважыў, што, прымаючы пад увагу сітуацыю, гэтага недастаткова і заклікаў да далейшага скарачэння здабычы. Такім чынам, рынкі чакалі новага расейска-савудаўскага пагаднення. Аднак Масква гэтым раз сказала «не». У адказ Савудаўская Арабія пачала вайну коштаў нафты, значна павялічыўшы здабычу», - паказвае Сяргей Гурыеў, былы галоўны эканаміст Еўрапейскага банка рэканструкцыі і развіцця, прафесар эканомікі парыжскай Школы палітычных навук, у інтэрв'ю (Le Point) (пераклад - inopressa.ru).

«Многія экспэрты мяркуюць, што такую стратэгію праводзіць Ігар Сечын, прэзідэнт расейскай нафтавай кампаніі «Раснафта». Ён не меў сілы вытрываць таго, што зніжэнне здабычы, Расеяй і Савудаўскай Арабіяй, прыносіць выгаду амерыканскім кампаніям здабычы сланцавага газу, якія праз гэта маглі яшчэ больш павялічыць сваю дзель рынку. Відавочна, што мэтай Расеі было «пакараць» амерыканскіх вытворцаў сланцавага газу», - тлумачыць Гурыеў.

«На мой погляд, з боку Расеі гэта памылка і дзіўны разлік, калі не сказаць больш. Магчыма, бягучае падзенне кошту нафты аслабіць і нават часова адхіліць амерыканскія кампаніі, некаторыя з іх збанкрутуюць і павінны будуць змяніць уладальніка. Але як толькі адбудзецца рост коштаў, амерыканскія вытворцы сланцавага газу зноў павялічаць аб'ёмы здабычы», - сцвярджае суразмоўца выдання.

«Цяпер мне хочацца нагадаць, што калі б Расея прыйшла да пагаднення з Савудаўскай Аравіяй аб далейшым падзенні здабычы нафты, то яна не пралічылася б у фінансах. Скарачаючы сваю дзённую здабычу на 300 тысяч барэляў, яна, безумоўна, страціла б эквівалент 3% здабычы нафты. Але ў той жа час такое пагадненне павялічыла б цану за барэль на 10-15 даляраў. Тады як у сітуацыі, якая склалася Расея нязменна саступае. На мой погляд, расейскі разлік не вельмі разумны», - аналізуе экспэрт.

«Расейскі бюджэт звярстаны зыходзячы з кошту нафты 42 даляры за барэль, а не 20 даляраў. Тым не менш, сітуацыя не катастрафічная. У Масквы па-ранейшаму ёсць вялікія фінансавыя рэзервы. (...) У Расеі дастаткова рэзерваў на бліжэйшыя тры гады, - мяркуе Гурыеў. - (...) Цалкам магчыма, што Савудаўская Арабія і Расея ў выніку дамовяцца, і гэта падштурхне цэны ўверх. Але Эр-Рыяд мае намер змагацца, паколькі ён лепш узброены, чым Расея, у яго значныя запасы нафты, а галоўнае, нізкі сабекошт здабычы ў параўнанні з расейскімі вуглевадародамі. Такім чынам, Савудаўская Арабія можа змагацца на гэтым полі бою столькі, колькі пажадае».

«Крызіс, звязаны з эпідэміяй каранавіруса ў Расеі, можа змяніць сітуацыю, тым больш што расейскія лічбы не зусім зразумелыя. У панядзелак Масква ўступіла ў свой першы дзень карантыну (хоць масквічы яшчэ могуць хадзіць на працу). Калі краіна пяройдзе да «французскага» сцэнару (захады агульнага карантыну ва ўсёй краіне), тады сітуацыя стане цалкам іншая, і малаімаверна, што ў Расеі апынецца дастаткова рэсурсаў для таго, каб супрацьстаяць крызісу», - мяркуе Сяргей Гурыеў.