Прэзідэнт Літвы не давярае афіцыйнай інфармацыі пра каранавірус у Беларусі

Сітуацыя значна горшая.

Літоўскі прэзідэнт Гітанас Наўседа мяркуе, што давяраць афіцыйнай інфармацыі Беларусі аб каранавірусе нельга, сітуацыя там значна горшая.

«Мы не можам давяраць гэтай інфармацыі, якую атрымліваем афіцыйна з Беларусі, бо я мяркую, што беларускі кіраўнік ацэньвае сітуацыю з пэўнай бравадай», - заявіў у сераду журналістам кіраўнік дзяржавы, піша kurier.lt.

«Цалкам магчыма, што сапраўдная статыстыка значна горшая, бо мы ведаем пра пэўныя асяродкі на беларускай тэрыторыі і выпадкі смерці, якія фіксуюцца», - сказаў ён.

Пра тое, што кіраванне крызісам з прычыны каранавірусу ў Беларусі не з'яўляецца эфектыўным, напярэдадні ў Сэйме заяўляў і міністр замежных спраў Літвы Лінас Лінкявічус. Ён таксама сказаў, што разглядаецца магчымасць абмежаваць авіярэйсы з Менска ў Вільню, якія яшчэ здзяйсняюцца.

Паводле слоў прэзідэнта, варта абмежаваць кантакты з краінай, якая не кантралюе сітуацыю, калі рызыка сапраўды адчувальная.

«Я думаю, што заўвага спадара Лінкявічуса своечасовая, і калі гэты рызыка сапраўды адчувальная, мы павінны абмежаваць усе кантакты з краінай, якая цяпер занадта лёгка ацэньвае успышку каранавіруса і магчыма, што ў сувязі з гэтым яе чакаюць цяжкія наступствы», - падкрэсліў Наўседа.

Паміж Вільняй і Менскам усё яшчэ ажыццяўляюцца рэгулярныя рэйсы авіякампаніі «Белавія».

Беларусь застаецца адзінай дзяржавай рэгіёну, якая не закрыла свае межы ў сувязі з пандэміяй каранавіруса.

Нагадаем, што Міністэрства аховы здароўя Беларусі не падае прамую інфармацыю пра колькасць інфікаваных новым каранавірусам у краіне.