Польшча накіравала Беларусі гуманітарную дапамогу для барацьбы з COVID-19
64- 23.04.2020, 19:25
- 32,060
Груз прыбудзе з Варшавы ў Менск 24 красавіка.
Польшча накіравала партыю гуманітарнай дапамогі ў Беларусь для барацьбы з эпідэміяй COVID-19, паведамляе naviny.by.
Як паведамілі БелаПАН у польскім пасольстве ў Менску, груз з гуманітарнай дапамогай 23 красавіка адправіўся з Варшавы і 24 красавіка прыбудзе ў Беларусь.
Адзначаецца, што гэта дэзінфікуючыя сродкі (50 тысяч літраў), антысептычныя сродкі (30 тысяч літраў) і хірургічныя маскі (100 тысяч штук).
У афіцыйнай перадачы гуманітарнай дапамогі ўдзельнічаў амбасадар Беларусі ў Рэспубліцы Польшча Уладзімір Чушаў, камендант польскай Дзяржаўнай супрацьпажарнай службы Анджэй Барткавяк, а таксама намеснікі міністра дзяржаўных актываў і міністра замежных спраў Мацей Малецкі і Марцін Пшыдач.
Дарыльшчыку гуманітарнай дапамозе з'яўляюцца дзяржаўныя прадпрыемствы і Міністэрства аховы здароўя Польшчы, а ў якасці пасярэдніка пры перадачы выступіў Фонд міжнароднай салідарнасці. Дастаўку забяспечвае Дзяржаўная супрацьпажарная служба.
Атрымальнікам гуманітарнай дапамогі з'яўляецца ўказаны Міністэрствам аховы здароўя Беларусі Рэспубліканскі цэнтр арганізацыі медыцынскага рэагавання ў Менску. Частка дапамогі прызначаная для Горадні і Гарадзенскай вобласці - рэгіёну, дзе пражывае большасць прадстаўнікоў польскай дыяспары.
«Аказваючы дапамогу Беларусі ў барацьбе з пандэміяй віруса COVID-19, Польшча дэманструе салідарнасць суседзяў і рэалізуе свае абавязанні ў адпаведнасці з Дамовай аб добрасуседстве і дружалюбным супрацоўніцтве паміж Рэспублікай Польшча і Рэспублікай Беларусь, падпісанай у 1992 годзе», - гаворыцца ў паведамленні амбасады.