Oxford Economics: Трамп можа прайграць выбары праз пандэмію

Сем штатаў ЗША могуць перайсці на бок Дэмакратычнай партыі.

Паводле прагнозу аналітыкаў Oxford Economics, на выбарах у лістападзе 2020 года сем штатаў ЗША могуць перайсці на бок Дэмакратычнай партыі, што забяспечыць перамогу яе кандыдату, піша delfi.lt са спасылкай на DW.

Праз пандэмію каранавіруса прэзідэнт ЗША Дональд Трамп можа пацярпець «гістарычную» паразу на выбарах у лістападзе 2020 года, мяркуе аналітычная кампанія Oxford Economics. У выніку неспрыяльнай эканамічнай сітуацыі ў ЗША абедзве мадэлі, па якіх экспэрты кампаніі прагназуюць вынікі прэзідэнцкіх выбараў, паказваюць перамогу кандыдата ад Дэмакратычнай партыі, паведамляецца ў мікраблогу Oxford Economics у Twitter у сераду, 20 траўня. Пры гэтым аналітыкі адзначаюць, што вырашальную ролю могуць выканаць прыход выбарцаў і развіццё сітуацыі з каранавірусам.

Паводле першай мадэлі, восенню ўзровень беспрацоўя ў ЗША перавысіць 13%, а сярэднедушавы даход упадзе прыкладна на 6% у параўнанні з леташнім паказчыкам, паведамляе тэлекампанія CNN, што азнаёмілася з дакладам аналітыкаў. Такім чынам, стан амерыканскай эканомікі будзе заставацца самым горшым з часоў Вялікай дэпрэсіі канца 20-х - пачатку 30-х гадоў мінулага стагоддзя, мяркуюць у Oxford Economics.

Наступная мадэль разглядае сітуацыю ў кожным штаце ў асобнасці, гаворыцца далей у паведамленні CNN. На яе падставе экспэрты мяркуюць, што сем штатаў, дзе раней Рэспубліканская і Дэмакратычная партыі вялі актыўную барацьбу, пяройдуць на бок дэмакратаў. Гаворка ідзе пра Аёва, Вісконсін, Мічыган, Пенсільванію, Агаё, Місуры і Паўночную Караліну, якія, на думку аналітыкаў, асабліва моцна зазнаюць эканамічны спад і беспрацоўе, выкліканыя пандэміяй.

Першая мадэль дапамагла прадказаць вынікі многіх выбараў у ЗША

З дапамогай першай мадэлі былі дакладна прадказаны вынікі ўсіх выбараў прэзідэнта ЗША з 1948 года, за выключэннем 1968 і 1976 гадоў. Другая мадэль была распрацаваная ў 2019 годзе. Калі б яна ўжывалася раней, то дала б дакладны прагноз у дачыненні да выбараў прэзідэнта ЗША 2016 года і яшчэ сямі з дзевяці галасаванняў, якія праходзілі ў краіне з 1980 года.

Паводле звестак міжнароднай групы валанцёраў Worldometers, ЗША знаходзіцца на першым месцы ў свеце па колькасці выяўленых заражэнняў каранавірусам (больш за 1,5 млн) і смяротных зыходаў (амаль 95 тысяч). Усяго на планеце заразілася ўжо звыш 5 млн чалавек. Пры гэтым амаль 330 тысяч хворых на COVID-19 памерла, і больш за 2 млн чалавек паправілася.