Дыджэі Перамен ужо на волі

З Уладам Сакалоўскім правялі гутарку ў МУС.

Гукарэжысёра Улада Сакалоўскага, які нядаўна выйшаў з ЦІП на Акрэсціна, сёння забіралі ў МУС. Ён паспеў паведаміць сваякам, што яго вязуць на вуліцу Гарадскі Вал, дзе знаходзіцца цэнтральны апарат МУС. Гэтую інфармацыю пацвердзіў адвакат Міхаіл Баднарчук. Праз пару гадзін яго адпусцілі - высветлілася, запрашалі на размову, піша tut.by.

Пра сваё затрыманне Улад Сакалоўскі паведаміў сваякам. Паводле інфармацыі адваката, Улад знаходзіўся ў цэнтральным апараце МУС, аднак да кліента яго не пускалі.

- Толькі сказалі, што хутка павінны адпусціць.

Інфармацыю пра затрыманне Улада таксама пацвердзіў яго калега Кірыл Галанаў, які таксама атрымаў дзесяць дзён адміністрацыйнага арышту за песню «Перамен», якая прагучала ў Кіеўскім скверы на дні адчыненых дзвярэй

- A 16.20 мы размаўлялі з Уладам праз тэлефон. Ён распавёў, што на заўтра ён мусіць быць у МУС, пытаўся, ці звязваліся са мной. Я адказаў, што мне ніхто не тэлефанаваў, - распавядае Кірыл Галанаў. - Даслоўна праз дзве хвіліны набраў Улада яшчэ раз, ён сказаў: «Кірыл, мне звоняць у дзверы». І папрасіў звязацца з адвакатам. Яшчэ паспеў напісаць сваёй дзяўчыне: «Мяне забралі».

А 20.00 стала вядома, што Улада адпусцілі.

- Сакалоўскага запрасілі на размову, ён прыехаў з супрацоўнікамі МУС, яго ніхто не затрымліваў, - патлумачыла Вольга Чамаданава, афіцыйны прадстаўнік МУС. - У дачыненні да Сакалоўскага ніякіх крымінальных і адміністрацыйных працэсаў не вядзецца. З ім пагутарылі, і ён з'ехаў.

Нагадаем, на 6 жніўня быў заяўлены вялікі мітынг у падтрымку Святланы Ціханоўскай. Аднак усе дазволеныя пляцоўкі былі занятыя гарадскімі мерапрыемствамі. У выніку ў парку Дружбы народаў прайшло заяўленае ўладамі свята, прысвечанае Дню чыгуначных войскаў. За некалькі сотняў метраў ад парку - у Кіеўскім скверы - павінен быў прайсці дзень адчыненых дзвярэй устаноў дадатковай адукацыі. Але тут сабралася шматтысячны натоўп - і нешта пайшло не так. Выступ баяніста Віталя Варанко нечакана перапыніла песня «Перамен» Віктара Цоя. Высветлілася, супрацоўнікі Палаца дзяцей і моладзі, якія стаялі за пультам, свядома ўключылі гэтую кампазіцыю. На руках хлопцаў былі белыя бранзалеты. Уладзіслаў і Кірыл заявілі журналістам, што зрабілі гэта свядома, таму што хочуць перамен і гатовыя да таго, што заўтра застануцца без працы. Нечаканую змену праграмы прысутныя, якіх да таго часу сабралася ўжо некалькі тысяч, падтрымалі крыкамі «Малайцы!» і апладысментамі.

Пасля мерапрыемства хлопцаў асудзілі на 10 дзён арышту.