У Менску звольніўся памочнік пракурора Першамайскага раёна

Ён хацеў пачаць праверку датычна парушэнняў сілавікоў.

Сёння раніцай Яўген Бабак зайшоў у будынак пракуратуры ў якасці памочніка пракурора Першамайскага раёна Менска, а выйшаў беспрацоўным. Кажа, паглядзеўшы відэа, як людзі ў форме супрацоўнікаў ДАІ збіваюць байкераў, ён напісаў дакладную запіску наконт правядзення праверкі датычна гэтага факта. Але пракуратура да справы так і не падключылася, Яўген прыняў для сябе пастанову сысці са службы, піша tut.by.

З Яўгенам Бабаком журналісты сустрэліся праз гадзіну пасля таго, як была падпісаная заява на звальненне праз пагадненне бакоў. Як расказвае ўжо былы памочнік пракурора Першамайскага раёна Менска, пра гэты крок ён задумваўся даўно, але апошнія падзеі сталі каталізатарам.

– Я зразумеў, што далей прадаўжаць працаваць у гэтай структуры не мае ніякага сэнсу, – каментуе сваё звальненне Яўген Бабак. – Прычыны сыходу – бяздзейнасць, маўчанне з боку пракурорскіх чыноў, палкоўнікаў, кіраўніцтва горада, Генеральнай пракуратуры ў адказ на тое беззаконне, якое, на мой погляд, адбываўся на вуліцы. Нават не было сказана да пэўнага моманту, што будзе праведзеная праверка датычна фактаў бясчынстваў, што тры дні былі з боку праваахоўных органаў. Паколькі нічога не было, я напісаў дакладную запіску наконт правядзення праверкі падзеяў, якія адбыліся на тэрыторыі нашага раёна.

Гаворка ідзе пра падзеі 11 жніўня: у сталічным мікрараёне Уручча міліцыя жорстка затрымала шасцярых матацыклістаў, сярод якіх былі тры дзяўчыны. Момант затрымання знялі на відэа відавочцы. Пасля затрымання хлопцаў даставілі ў РУУС, дзе некаторых з іх збілі, а потым змясцілі ў ЦІП на Акрэсціна і жодзінскае СІЗА. Байкеры ўжо знялі пабоі і звярнуліся з заявай у СК.

– Калі я падаў дакладную запіску, было агучана, што частка матацыклістаў ужо напісала заявы ў СК. Але як мінімум з боку пракуратуры не было ніякіх заяваў, не давалася інфармацыя, што адбываецца. Планавалася, што мы самі будзем праводзіць праверку, але, як я разумею, кіраўніцтва пастанавіла далучыць дакладную запіску да матэрыялаў СК, – адзначае Яўген Бабак.

Ён тлумачыць: пытанне пра пачатак крымінальнай справы развязваецца не адразу, а пасля правядзення праверкі, калі становіцца зразумела, ёсць падставы для крымінальнай справы ці не, перавысілі службовыя паўнамоцтвы людзі ў форме ДАІ ці не, ці было нешта супрацьпраўнае з боку байкераў. Дарэчы, у пракуратуры ёсць права распачынаць крымінальную справу ў дачыненні да супрацоўнікаў міліцыі. І на думку нашага суразмоўцы, «датычна абуральных выпадкаў» пракуратура павінна сама праводзіць праверкі.

– Не ведаю, як пракуроры, але людзі чакалі, што выступіць генеральны пракурор і дасць ацэнку відэа, на якім зафіксаваны факты гвалту. У выніку Канюк заявіў, што мітынгі трэба ўзгадняць з мясцовымі ўладамі. Якая была ў Вас рэакцыя?

– На той момант я ўжо цвёрда вызначыў, што буду звальняцца. Выступ генеральнай пракуратуры мяне не здзівіў – усё, што магу сказаць з гэтай нагоды.

У пятніцу на той момант яшчэ дзейны памочнік пракурора Першамайскага раёна Менска Яўген Бабак напісаў заяву на звальненне праз пагадненне бакоў. Сёння яе падпісалі.

– Яўген, Вы бачылі відэа ў інтэрнэце, наколькі правамоцна было выкарыстанне спецсродкаў і зброі ў дачыненні да людзей?

– У нас любяць казаць: «Вы не бачылі, што было да гэтага». Дык вось толькі на падставе гэтых відэа, я раблю выснову – у 99% ужыванне гвалту было неапраўданым, неабгрунтаваным. Не разумею, на падставе чаго ён ужываўся. Гэта без ацэнкі іншага боку, мы не чулі, што казалі праваахоўнікі.

Цяпер на руках ужо ў былога пракурора працоўная кніжка, пытаемся, ці не спрабавалі яго ўтрымаць на працоўным месцы.

– Не, яшчэ на мінулым тыдні нас збіраў пракурор раёна, сказаў, калі ў кагосьці ёсць ўнутраныя маральныя пакуты і сумневы, хто-небудзь хоча звольніцца, ніякіх перашкодаў не будзе. У гэтым плане ў пракуратуры ўсё вельмі годна. Нам сказалі, што выдатна разумеюць, з якой прычыны звальняюцца супрацоўнікі і пажадалі поспехаў на новай ніве.

– І чым Вы цяпер зоймецеся?

– Буду шукаць працу, якую – яшчэ не ведаю.

– Няма страху, што застаняцеся без сродкаў да існавання, без працы?

– Мне няма яшчэ 30, не жанаты, дзяцей няма, напэўна, таму так лёгка прыняў пастанову звольніцца. Здароўе дазваляе пакуль падпрацоўваць на будоўлі, пайсці ў таксі, у мяне няма такога: калісьці працаваў пракурорам, «вызначаў лёсы» і іншая праца ганебная. Гэта не пра мяне.

Калі вы хочаце дапамагчы Яўгену з працаўладкаваннем, пішыце на адрас babakevgen1991@gmail.com.