Як кіроўца BMW адмовіўся саступаць аўто без нумароў і быў горача падтрыманы жыхарамі «Каскада»

Гэта была другая перамога жыхароў менскага ВК «Каскад».

Учора, 5 верасня, у менскі ВК «Каскад» прыбылі супрацоўнікі МНС на аўтакране ў суправаджэнні людзей у балаклавах, піша «Онлайнер». Падчас разгорнутай «спецаперацыі» Супрацоўнікі МНС спрабавалі зняць расцяжкі з бел-чырвона-белымі сцягамі. Але не толькі жыхароў, якія ратавалі сцягі, віталі плясканнем у ладкі. Людзі скандавалі «Малайчына!» кіроўцу BMW, што адмовіўся даваць назад пры сустрэчным раз'ездзе з мікрааўтобусам Volkswagen, які рухаўся без рэгістрацыйных знакаў.

Калі спецтэхніка ў суправаджэнні машыны ДАІ, аўтазакі і мікрааўтобуса без нумароў ужо збіралася пакідаць тэрыторыю жылога комплексу, журналісты сталі сведкамі кур'ёзнай сцэны.

Аўтакран МНС, у якога, кажуць, даўжыня вылету стрэлы складае аж 90 метраў, доўга не мог развярнуцца. Пакуль кіроўца пры актыўнай дапамозе калегаў і сілавікоў манеўраваў, на мясцовым праездзе сабралася некалькі аўтамабіляў. Рух па тэрыторыі ВК ніхто не касаваў.

Першым у калоне быў мікрааўтобус Volkswagen без нумароў. Аднак чалавеку ў масцы, які знаходзіўся за стырном, не ўдалося хутка і аператыўна праехаць. Сустрэчны кіроўца BMW наадрэз адмовіўся саступаць дарогу.

«Забараняецца ўдзел у дарожным руху транспартнага сродку без усталяваных у прадугледжаных месцах рэгістрацыйных знакаў (часовых нумарных знакаў), транспартнага сродку, які мае сляды перайначвання або знішчэння рэгістрацыйных знакаў (часовых нумарных знакаў), а таксама маркіровак кузава, шасі, рамы, нанесеных на іх раней арганізацыяй (заводам)-вытворцам (за выключэннем зарэгістраваных ва ўстаноўленым парадку)» (пункт 194.2 ПДР).

І не абавязаны быў! Паводле ПДР, нагадаем, пры сустрэчным раз'ездзе кіроўца, з боку якога маецца перашкода, абавязаны саступіць дарогу.

Такія канфлікты рэгулярна ўзнікаюць у дварах і на вузкіх вулачках, застаўленых аўтамабілямі. Але ў гэтай гісторыі пікантнасці дадавала тое, што менавіта сілавікі абавязаныя былі саступаць дарогу.

Хто каго? Людзі, жыхары комплексу сталі на бок кіроўцы BMW. Да яго ж паспяшаліся супрацоўнікі ДАІ. Аднак гэта, відавочна, мала збянтэжыла мужчыну, які мужна бараніў свае правы. Не меншае захапленне выклікала ягоная пасажырка, якая абыякава ў гэты час папраўляла макіяж.

«Калі сустрэчны раз'езд транспартных сродкаў ускладнены, то кіроўца, на баку якога маецца перашкода для дарожнага руху, абавязаны саступіць дарогу» (пункт 98 ПДР).

Сітуацыя, здавалася, усё больш напальвалася. Людзі раілі супрацоўнікам ДПС узгадаць пра ПДР. Аднак пасля непрацяглай размовы менавіта кіроўца мікрааўтобуса стаў даваць назад. Гэта выклікала ўсеагульнае захапленне.

- Ма-лай-чы-на! - апантана выгуквалі людзі кіроўцу BMW, які не ўступіў напору сілавікоў.

Гэта была другая за апошнія гадзіны маленькая перамога жыхароў ВК «Каскад». Раней, нагадаем, за дзве з паловай гадзіны з пачатку спецаперацыі, падчас якой быў задзейнічаны ўнікальны для Беларусі аўтакран, як мінімум адзін экіпаж ДАІ, блізу два дзясяткі сілавікоў, атрымалася «справіцца» з трыма расцяжкамі (сцягі людзі паспелі зацягнуць у вокны). А яшчэ не менш за пяць прадаўжалі вісець паміж дамамі.