У Польшчы былога прэм'ера Дональда Туска за хуткую язду пазбавілі правоў на тры месяцы

Кіраўнік апазіцыйнай партыі «Грамадзянская платформа» мяркуе, што пакаранне справядлівае.

Паліцыя Польшчы пазбавіла былога старшыню Еўрапейскай рады, экс-прэм'ера рэспублікі і лідара найбуйнейшай апазіцыйнай партыі «Грамадзянская платформа» Дональда Туска правоў кіроўцы на тры месяцы за перавышэнне хуткасці. Пра гэта паведаміў у суботу ў Twitter сам палітык.

«Ёсць парушэнне правілаў дарожнага руху. Ёсць пакаранне ў выглядзе пазбаўлення правоў на тры месяцы, дзесяці штрафных балаў і штрафу», – інфармаваў Туск, падкрэсліўшы, што мяркуе, што пакаранне справядлівае, і прымае яго без дыскусіі.

Інцыдэнт здарыўся ў Цэнтральным Мазавецкім ваяводстве Польшчы. «Блізу 11:00 у мясцовасці Вішнева каля горада Млава паліцыя затрымала 64-гадовага кіроўцу Skoda, які ў гарадской мяжы перавысіў хуткасць больш чым на 50 км/г», – інфармавала прэс-сакратарка мясцовай паліцыі Ганна Паўлоўская.

Паводле звестак інфармацыйнага партала Interia, Туск ехаў з хуткасцю 107 км/г.