Мінус сотні мільёнаў: Колькі страціць Беларусь праз новыя правілы для таксістаў

Мінтранс рыхтуе дзіўную «рэформу» на рынку пасажырскіх перавозак.

Даследаванне, праведзенае Асацыяцыяй перавознікаў і дыспетчараў (АПІД) паказала, што ўзмацненне жорсткасці рэгулявання пасажырскіх перавозак можа нанесці шкоду эканоміцы на сотні мільёнаў рублёў.

Даследаванне датычылася таго, які эканамічны эфект прынясе прапанаваная Мінтрансам рэформа на рынку таксі ў Беларусі. Яна накіраваная на ўвядзенне шэрагу такіх абавязковых патрабаванняў, як ліцэнзіі на кіроўцаў, машыны, паркі, платформы, а таксама недапушчэнне, у сутнасці, да перавозкі пасажыраў тых, хто не з'яўляецца кіроўцам на асноўным месцы працы, піша avto.ej.by.

Паводле даследавання, павелічэнне коштаў паездак, часу чакання таксі, а таксама пагаршэнне якасці абслугоўвання – гэта тыя непрыемныя наступствы, якія могуць чакаць шараговага пасажыра пры ўвядзенні новых правілаў для аўтамабільных перавознікаў. Новае рэгуляванне можа прывесці да сыходу замежных анлайн-платформаў і немагчымасці кіроўцам выкарыстоўваць таксі як крыніцу дадатковага прыбытку.

Паводле экспертных ацэнак, 30–40% рынку таксі складаюць кіроўцы, для якіх гэтая праца не з'яўляецца асноўнай. Новае рэгуляванне здольнае альбо пакінуць іх «за бортам», альбо падштурхнуць да пераходу ў ценевы сегмент рынку. Як вынік – павелічэнне коштаў на паездкі, часу чакання і агульная тэндэнцыя зніжэння даступнасці таксі для насельніцтва. Для дзяржавы скарачэнне рынку будзе азначаць актуалізацыю праблемы падзення прыбыткаў не толькі насельніцтва, але і бюджэту.

Паводле разлікаў АНІД, падатковыя паступленні ў бюджэт ад рынку нерэгулярных аўтамабільных перавозак складаюць да 170 млн рублёў за год, але ў разгляданай сітуацыі могуць скараціцца як мінімум на 55–70 млн рублёў, у тым ліку праз сыход пераважнай большасці кіроўцаў «у цень».

«Эфект даміно» ў дачыненні да запаволення развіцця іншых лічбавых платформаў – яшчэ адно чаканае наступства рэгулятарных маніпуляцый на рынку перавозак. Бачныя бар'еры і рызыкі іх ужывання ў іншых сферах лічбавай эканомікі могуць прывесці да скарачэння інвестыцый у развіццё мноства дзяржаўных (банкі, страхавыя арганізацыі, аўтапаркі) і прыватных кампаній на рынку транспартных і іншых паслуг Беларусі.

«Унікнуць будучай праблемы можна, укараняючы прагрэсіўныя падыходы да рэформы. Па прыклады не трэба хадзіць далёка: па ўсёй Расеі з ліпеня 2020 года дзейнічае спецыяльны падатковы рэжым для самазанятых, які дазваляе ў тым ліку і кіроўцам таксі працаваць на сябе і прыносіць прыбытак у дзяржбюджэт. Такая сістэма дазволіла вялікай колькасці насельніцтва зноў працаваць легальна і павялічыла паступленне падаткаў у бюджэт. Напрыклад, у Маскве за 11 месяцаў 2020 года падатковыя паступленні павялічыліся ў два разы ў параўнанні з цэлым 2019 годам. Таксама пасля дарэгулявання галіны ў скандынаўскіх краінах і Фінляндыі істотна вырас рынак таксі і, адпаведна, падатковыя паступленні, самі паездкі сталі больш даступнымі, а на рынку ў выніку канкурэнцыі ў цэлым павысіўся ўзровень абслугоўвання», – адзначаюць аўтары даследавання.