Літва: Кантрабанда - бізнэс беларускіх уладаў, цыгарэты закладваюць у вагоны проста на заводах

Літоўскі Камітэт нацыянальнай бяспекі заняўся шэрымі схемамі Менска.

Выданне LRT паведамляе, што прылада для рэнтгенаўскага надгляду вагонаў на беларуcка-літоўскай мяжы не працуе з 2016 года. Праз гэта чыгунка стала адным з самых хадавых маршрутаў для кантрабанды беларуcкіх цыгарэт.

Даслоўна два тыдні таму літоўскія мытнікі канфіскавалі 30 500 пачакаў кантрабандных цыгарэт, якія былі схаваныя ў адным з вагонаў грузавога цягніка. Гэта далёка не адзіная кантрабанда, якую змаглі злавіць, але важна тое, што праз нядзейнае рэнтгенаўскае абсталяванне выявіць кантрабанду ў разы складаней.

«У маёй галаве гэта больш чым скандальна, і я не разумею, як літоўская дзяржава магла гэта дапусціць. Гэта азначае, што нашы пастановы адкрываюць шлях злачыннай дзейнасці гэтых рэжымаў і на тэрыторыі Літвы. Я падазраю, што гэта не выпадкова. Было б вельмі дзіўна выказаць здагадку, што за пяць гадоў, нават калі б былі праблемы, іх нельга было развязаць. Мабыць, хтосьці вельмі зацікаўлены ў тым, каб яны не развязваліся», - заявіў Марыўс Лаўрынавічус, экспэрт Віленскага інстытута палітычнага аналізу.

Рэнтген выключаны - цыгарэты цякуць, а ў гэтым годзе кантрабанда ідзе на рэкорд.

Штодня беларуска-літоўскую мяжу перасякаюць мінімум 20 таварных цягнікоў. Кантрабандысты выдатна ведаюць, што рэнтген не працуе і гэта стала прычынай таго, што дзве траціны цыгарэт, якія вывозяцца з Беларусі, дастаўляюцца ў Літву па чыгунцы. А ў гэтым годзе плынь кантрабанды значна вырасла і можа стаць рэкорднай.

Да прыкладу, толькі Дзяржаўныя памежныя службы Літвы за чатыры месяцы гэтага года выявіла 17 выпадкаў чыгуначнай кантрабанды, а чыгуначнікі знаходзяць кантрабанду цыгарэт з Беларусі даслоўна праз дзень.

«Раней мы знаходзілі яе кожны тыдзень, а цяпер кожны другі ці кожны трэці дзень. Не ведаю, ці выпадкова гэта, але такое ўражанне, што пасля тых прэзідэнцкіх выбараў, беларускі бок кантрабанду ўжо не абмяжоўвае», - сказаў Роландас Шляпеціс.

Кантрабанда - важная крыніца даходу

Экспэрты кажуць, што рост кантрабанды абумоўлены тым, што на рэжым Лукашэнкі ўплываюць заходнія санкцыі, а эканамічная сітуацыя ў краіне імкліва пагаршаецца.

Са слоў Марыўса Лаўрынавічуса, кантрабанда цыгарэт цяпер з'яўляецца важнай крыніцай даходу для так званай улады ў Беларусі.

«Для такіх рэжымаў, як Лукашэнка і Пуцін, кантрабанда - гэта дзяржаўны бізнэс. Рост у апошні час не дзіўны. Лукашэнка сутыкнуўся з эканамічнымі праблемамі ў выніку санкцый, відавочна, што ён спрабуе кампенсаваць гэта крымінальным бізнэсам. Зараз гэта крыніца даходу, якая павінна кампенсаваць іншыя страты», - кажа ён.

Пра гэта кажуць і іншыя афіцыйныя асобы ў Літве. Са слоў прадстаўніка Дзяржаўнай памежнай службы Данатаса Шкарнуліса, цыгарэты ўжо закладваюць у вагоны на тэрыторыі заводаў.

«Згодна з крыніцай крымінальнай выведкі, некаторыя цыгарэты, якія ўвозяцца ў Літоўскую Рэспубліку, загружаюцца на заводах вытворчасці ўгнаенняў, дзе фармуюцца вагоны. У нас ёсць звесткі, што супрацоўнікі гэтых кампаній нават паведамляюць злачынцам, які вагон прызначаецца пастаўшчыку і яны ведаюць, што гэты вагон паедзе ў Літву ў Клайпеду. Таму туды трэба змяшчаць цыгарэты, якія потым будуць кантрабандай увозіць у Літву», - сказаў ён.

У артыкуле гаворыцца, што на мінулым тыдні Камітэт нацыянальнай бяспекі збіраўся наконт гэтай праблемы, але падрабязнасці сустрэчы не выдаюцца.