Улады Еўразвязу зацвердзілі сертыфікаты COVID-19

Сертыфікаты дазволяць аслабіць абмежаванні на перамяшчэнне ўнутры ЕЗ.

Еўрапарламент і Рада Еўразвязу дамовіліся ўвесці сертыфікаты COVID-19, якія дазволяць аслабіць абмежаванні на перамяшчэнне ўнутры ЕЗ у разгар летняга сезону. Пра гэта паведамляе Reuters.

Гаворка ідзе пра бясплатны «зялёны пашпарт», які будзе існаваць у трох варыянтах. Адзін з іх будзе ўтрымліваць інфармацыю пра вакцынацыю, другі - пра выздараўленне, трэці - пра праходжанне тэсту на наяўнасць COVID-19. Кожны жыхар ЕЗ атрымае толькі адзін з гэтых трох варыянтаў у залежнасці ад сваёй канкрэтнай медыцынскай гісторыі. Дакументы пачнуць дзейнічаць з 1 ліпеня. Яны будуць даступныя як у электронным, так і ў друкаваным выглядзе.

Дзякуючы такому механізму ўлады краін ЕЗ будуць пазбаўлены ад неабходнасці ўводзіць складаныя меры кантролю за падарожнікамі. Цяпер кожнаму з іх дастаткова будзе паказаць просты дакумент альбо адсканаваць адпаведны QR-код. Іншым следствам новаўвядзення стане фактычная адмова ад карантынных мер у краінах ЕЗ, за выключэннем асаблівых выпадкаў, такіх як успышкі эпідэміі новых штамаў.

26 траўня пытанне пра сертыфікаты разгледзіць камітэт грамадзянскіх свабод Еўрапарламента, а ў першай палове чэрвеня, як чакаецца, дакумент будзе зацверджаны самім Еўрапарламентам.

Схема сертыфікацыі будзе распаўсюджвацца толькі на грамадзян і рэзідэнтаў Еўразвязу. Яна не перасякаецца з планамі адкрыцця межаў для жыхароў трэціх краін, а таксама не ахоплівае тыя краіны Шэнгенскай зоны, якія не ўваходзяць у ЕЗ - Ісландыю, Ліхтэнштэйн, Нарвегію і Швейцарыю.

Цяпер амаль 40 адсоткаў жыхароў ЕЗ атрымалі хаця б адну дозу вакцыны супраць COVID-19. Гэта адпавядае тэмпам кампаніі вакцынацыі ў іншых развітых краінах. У больш бедных рэгіёнах свету сітуацыя нашмат горшая. З гэтай прычыны кампаніі Pfizer, Moderna і Johnson&Johnson падчас саміту G20 па ахове здароўя абвясцілі аб тым, што да канца 2022 году збіраюцца паставіць у краіны з нізкім узроўнем даходаў 3,5 мільярда доз вакцын зніжаным коштам. У сваю чаргу ўлады ЕЗ вырашылі ахвяраваць бедным краінам не менш за 100 мільёнаў доз вакцын, заявіла ў пятніцу прэзідэнт Еўрапейскай камісіі Урсула фон дэр Ляен.

20 траўня Рада ЕЗ зацвердзіла рэкамендацыі Еўракамісіі аб тым, каб дазволіць уезд тым замежным турыстам, якія прайшлі поўны курс вакцынацыі адным з прэпаратаў, зацверджаных Еўрапейскім агенцтвам лекавых сродкаў (EMA). Расейскія вакцыны не ўвайшлі ў гэты спіс, паколькі ні адна з іх не прайшла адпаведную праверку ў EMA.