«РасНафта» заявіла пра страту Гуцарыевым кантролю над кампаніяй
3- 14.07.2021, 20:11
- 13,528
У канцы чэрвеня буйны расейскі бізнэсмэн патрапіў пад санкцыі ЕЗ праз сувязі з Лукашэнкам.
У кампаніі «РасНафта» больш няма кантрольнай асобы, якой раней быў бізнэсмэн Міхаіл Гуцарыеў. Пра гэта гаворыцца ў паведамленні кампаніі, якое паступіла ў РБК.
«Рада дырэктараў ПАТ НК "РасНафта" на сваім паседжанні 13 ліпеня 2021 года разгледзела і ўзгадніла выснову пра адсутнасць у кампаніі кантрольнай асобы, уключаючы кантроль кампаніі з боку Міхаіла Гуцарыева. Рада дырэктараў прыйшла да гэтай высновы на падставе аналізу мемарандумаў незалежных юрыдычных кансультантаў, якія валодаюць кампетэнцыяй у галіне санкцыйнага заканадаўства ЕЗ», – паведамілі ў «РасНафце».
Эксперты пасля юрыдычнага аналізу прыйшлі да высновы, што Гуцарыеў больш не з'яўляецца кантрольнай асобай кампаніі «ў сілу адсутнасці ў яго правоў або паўнамоцтваў прызначаць або здымаць з пасады большасць чальцоў якога-небудзь адміністрацыйнага, кіраўнічага або нагляднага органа «РасНафты».
Акрамя таго, Гуцарыеў не валодае большасцю галасавальных акцый кампаніі і ў яго няма паўнамоцтваў, каб рабіць дамінантны ўплыў на яе.
Гадавы сход акцыянераў «РасНафты» 29 чэрвеня зацвердзіў новы склад рады дырэктараў, у якую Гуцарыеў таксама не ўвайшоў.
Пра тое, што бізнэсмэн пастанавіў пакінуць пасаду старшыні рады дырэктараў кампаніі і ўвогуле выйсці з яго «РасНафта» паведаміла 24 чэрвеня 2021 года. «Міхаіл Гуцарыеў прыняў пастанову пра выхад са складу Рады дырэктараў ПАТ НК “РасНафты”. Адпаведная заява паступіла ў кампанію», – паведамляла тады прэс-служба нафтавай кампаніі.