Літва кансультуецца з ЕЗ наконт транзіту «Беларуськалію»

Распрацоўваецца закон, які падаў бы варыянты для забароны транзіту калійных угнаенняў.

Урад Літвы вядзе кансультацыі з Еўразвязам наконт транзіту «Беларуськалію». Як заявіла сёння прэм'ер-міністарка краіны Інгрыда Шыманітэ, у аднабаковым парадку Літва не можа забараніць транзіт беларускіх калійных угнаенняў. З яе слоў, зараз распрацоўваецца закон, які падаў бы варыянты для разгляду такога пытання, паведамляе Delfi.

«Дзяржава ў аднабаковым парадку не мае права ўводзіць санкцыі ў дачыненні да сектара эканомікі, вытворцаў. Яны павінны быць узгодненыя з Еўракамісіяй», - сказаў Шыманітэ.

Яна дадала, што зараз урад праводзіць адпаведныя кансультацыі з Еўракамісіяй.

Нагадаем, транзіт беларускіх калійных угнаенняў працягнуўся праз Літву пасля 8 снежня, калі набылі моц санкцыі ЗША ў дачыненні да «Беларуськалія». Беларускі вытворца заплаціў аванс Літоўскай чыгунцы. Тым часам летам мінулага года палітыкі заяўлялі, што транзіт спыніцца ў снежні. Аднак выявілася, што санкцыі ЗША наўпрост не закранаюць літоўскія кампаніі і іх узаемаадносіны з беларускімі партнёрамі, у тым ліку праз тое, што разлікі праводзяцца ў еўра. Скасаванне кантракту з боку ЛЧ у аднабаковым парадку паграджае судовымі пазовамі з боку «Беларуськалію», якія ў выпадку задавальнення могуць прывесці да банкруцтва дзяржкампаніі.

У канцы снежня ўрадавая камісія Літвы прызнала, што дамова ўкладзеная ў 2018 годзе паміж «Беларуськаліем» і Літоўскімі чыгункамі, не адпавядае нацыянальнай бяспецы, а таксама змяненне, унесенае ў яе ў кастрычніку 2021 года. Пры гэтым канчатковае рашэнне ў прызнанні дамовы не адпаведнай нацыянальнай бяспецы застаецца за ўрадам краіны. Яно можа стаць падставай для яе скасавання.