Самалёт з Маямі ў Лондан развярнуўся над Атлантыкай праз адмову пасажыра надзець маску

Самалёту давялося вярнуцца ў аэрапорт Маямі праз гадзіну пасля вылету.

Самалёт кампаніі American Airlines, які ляцеў з Маямі ў Лондан, быў вымушаны вярнуцца ў аэрапорт адпраўлення праз тое, што пасажырка адмаўлялася надзець маску.

Паводле звестак службы адсочвання палётаў FlightAware, рэйс AAL38 са 129 пасажырамі на борце развярнуўся над акіянам прыкладна праз гадзіну пасля вылету. У Маямі яго сустрэла паліцыя, піша «Униан».

Інцыдэнт здарыўся яшчэ ў сераду, але падрабязнасці аб ім сталі вядомыя толькі зараз са слоў іншых пасажыраў, а таксама самой авіякампаніі, якая ўнесла пасажырку ў спіс асоб, якім забаронена лятаць з American Airlines на час расследавання, паведамляе Бі-бі-сі.

Пасажыр таго ж рэйса Стыў Фрыман у праграме навін «Miami's local 10 news» распавёў, што жанчына сядзела ззаду яго ў бізнэс-класе.

«У яе было вельмі шмат выпіўкі, і я крыху нерваваўся. Я бачыў, як на табло некалькі разоў з'яўляўся надпіс аб тым, што ў самалёце нельга знаходзіцца без маскі. Я прыкладна чакаў, што нешта падобнае здарыцца», - расказаў ён.

У выніку самалёт сапраўды развярнуўся і пасажырку, якой, наколькі вядома, за сорак, вывелі з самалёта і перадалі паліцыі.

Астатнім пасажырам рэйса, які вярнуўся, квіткі памянялі на іншыя рэйсы. І шмат хто быў у шоку, у тым ліку і ад паводзін авіякампаніі.

«Нам нічога не сказалі. Я думала, што і бортправаднікам нічога не сказалі. Адзінае, што мы пачулі ад пілотаў, - гэта тое, што з адным з пасажыраў адбылася надзвычайная сітуацыя і нам давядзецца развярнуцца», - расказала яшчэ адна пасажырка.

Паводле звестак Федэральнага авіяцыйнага кіравання ЗША, з пачатку пандэміі адбылося амаль 6 тысяч інцыдэнтаў з пасажырамі, якія адмаўляліся прытрымлівацца антыкаранавірусных правілаў. Толькі за першыя два тыдні гэтага года авіякампаніі паведамілі аб 151 інцыдэнце. Большасць з іх была звязана з пасажырамі, якія адмаўляліся апранаць маскі.