Украінскія дэпутаты заклікаюць прызнаць Беларусь акупаванай тэрыторыяй

У Вярхоўную Раду ўнесенае адпаведная прапанова.

Украінскі народны дэпутат Аляксей Ганчарэнка разам з іншымі калегамі ўнёс у Вярхоўную Раду прапанову прызнаць Беларусь тэрыторыяй, якую акупавала Расея. Пра гэта ён паведаміў у сваім Telegram-канале.

У праекце заявы народныя дэпутаты ўказваюць, што беларусы пакутуюць ад падвойнай акупацыі - з боку Расеі і рэжыму Аляксандра Лукашэнкі.

У праекце дакумента таксама ёсць заклік да міжнароднай супольнасці аб прызнанні тэрыторыі Беларусі часова акупаванай Расеяй. Народныя дэпутаты просяць пазбавіць урад Лукашэнкі міжнароднай правасуб'ектнасці і спыніць удзел Беларусі ў міжнародных арганізацыях, у тым ліку ААН і МВФ.

Украінскія дэпутаты заклікаюць сінхранізаваць санкцыі ў дачыненні да Расеі і Беларусі як акупаванай тэрыторыі, а таксама ўстараніць магчымасць абыходу Расеяй санкцый праз Беларусь і выкарыстання краіны ў якасці афшорнай зоны.