Японія высылае расейскага консула

Яму загадана пакінуць краіну да 10 кастрычніка.

Японія загадала расейскаму консулу ў Сапара пакінуць краіну цягам шасці дзён. Пра гэта паведамляе Kyodo.

Міністр замежных спраў Ёсімаса Хаясі паведаміў журналістам, што дыпламат генконсульства Расеі ў Сапара абвешчаны персонай non grata і яму прадпісана пакінуць краіну да 10 кастрычніка.

Гэты захад, сказаў міністр, з'яўляецца адказам на высылку Масквой японскага консула ва Уладзівастоку. Японія намагае, што консул Тацуноры Матакі, які вярнуўся на радзіму пасля таго, як МЗС РФ абвінаваціла яго ў шпіянажы, не здзяйсняў ніякіх супрацьпраўных дзеянняў.

Хаясі падкрэсліў, што пры затрыманні японскі дыпламат зазнаў у Расеі «неналежнае абыходжанне», напрыклад, яму завязвалі вочы і фізічна абмяжоўвалі.