NYT: Украіна імклівымі тэмпамі зараз вяртае кантроль над тэрыторыяй

Але вызваленыя гарады разбураны і бязлюдныя.

У горадзе Ліман засталося прыкладна 5 тысяч жыхароў, хаця да расейскага ўварвання тут жылі 22 тысячы чалавек.

За апошнія тыдні войска Украіны атрымала шэраг вайсковых перамог. Але гэтыя дасягненні маюць сумнае адценне. Тэрыторыі, якія ўкраінскія абаронцы вярнулі пад свой кантроль, сталі амаль бязлюднымі і ў руінах.

Сярод хваёвых лясоў і грудоў, дзе цяпер вядуцца баі на паўночным усходзе Украіны, бензавозы, танкі і грузавікі едуць па брудных дарогах на фронт міма цалкам знішчаных і закінутых гарадоў і вёсак, - піша New York Times. У Лімане, стратэгічна важным транспартным вузле, які войска Украіны вызваліла ў той жа дзень, калі Расея абвясціла аб анэксіі рэгіёна, свішча вецер над жылымі кварталамі, дзе ад многіх дамоў засталася толькі куча цэглы.

У Святагорску, куды калісьці з'язджаліся турысты і паломнікі, каб наведаць мясцовы праваслаўны манастыр, гатэль Roche Royal стаіць цалкам пустым. Кожнае яго акно выбіта, а пакоі і калідоры ўсеяныя шклом і абгорткамі ад расейскіх пайкоў.

«Мы вызваляем тэрыторыю, але без людзей», - сказаў украінскі вайсковец Віталь Загаруйка.

Азіраючыся на разбураны горад, ён расказаў пра нямногіх жыхароў, якія засталіся ў Святагорску.

«Расейцы прыйшлі і кажуць, што мы «братэрскія народы». А я кажу: мы не браты зараз. Браты не забіваюць адзін аднаго», - сказаў украінскі салдат.

New York Times піша, што падчас контрнаступлення на ўсходзе і поўдні войска Украіны хуткімі тэмпамі зараз вяртае кантроль над тэрыторыяй. Сёння чыноўнікі сказалі, што ўкраінскія вайскоўцы прарвалі расейскую лінію абароны ў Херсонскай вобласці.

Яе наступ з аднаго боку радуе ўкраінцаў, а з другога - адкрывае від на страшныя разбураныя гарады і вёскі, праз якія вайна прайшла двойчы: спачатку расейцы іх акупавалі, а затым ўкраінскае войска вызваліла. У Данбасе блізу 80% насельніцтва пераехалі ў іншыя рэгіёны краіны на захад ад пачатку ўварвання Расеі. Людзі або сталі ўнутранымі перасяленцамі на захадзе Украіны, або ўцекачамі ў Еўропе. Калі Украіна пачала контрнаступ у мінулым месяцы, некаторыя з тых, хто застаўся ў рэгіёне, уцякалі ў Расею. Загаруйка сказаў журналістам, што разумее такіх людзей, бо ў іх не было іншых варыянтаў.

Разам з тым прэзідэнт Украіны Уладзімір Зяленскі падчас вечаровага звароту запэўніў грамадзян, што не трэба ўцякаць у Расею. І калі ўкраінскі кантроль вернецца ў іх гарады, ім нічога не будзе пагражаць. New York Times піша, што некаторыя ўкраінцы, якія ўцяклі на тэрыторыю РФ, прызналіся, што з'ехалі, бо баяліся, што іх абвінавацяць у калабарацыянізме.

Выданне нагадвае таксама аб тым, што расейскае войска масава карае смерцю цывільных грамадзян, тым самым яшчэ больш спусташаючы акупаваныя рэгіёны. Калі войска Украіны зайшло ў горад Ізюм у мінулым месяцы, украінскія салдаты выявілі сотні не пазначаных магіл і масавых магіл у сасновым лесе. Украінскія ўлады яшчэ не падлічылі, якую колькасць насельніцтва страцілі вызваленыя раёны. Аднак у Лімане засталося ўсяго 5 тысяч чалавек. Хоць, паводле звестак мясцовай паліцыі, да пачатку ўварвання Расеі тут пражывала 22 тысячы чалавек.