Алег Жданаў: Мабілізацыя расейцам не дапаможа

Нават у Генштабе РФ гучаць тэзісы аб паразе ў вайне супраць Украіны.

Страта расейцамі плацдарма на правым беразе ракі Дняпро - гэта галоўная задача ўкраінскага войска на сёння, падчас контрнаступальнай аперацыі, якая працягваецца.

Аб гэтым заявіў украінскі ваенны экспэрт Алег Жданаў, паведамляе ТСН.

Паводле ягоных слоў, расейцы разумеюць, што УСУ імкнецца ліквідаваць плацдарм на правым беразе і вызваліць Херсон.

«Страта гэтага плацдарма фактычна здымае з парадку дня пытанне далейшага наступу расейскіх войскаў на Мікалаеў і Адэсу і захоп Малдовы, адрэзаўшы Украіну ад Чорнага мора. Гэта тое, пра што марыў Пуцін», - дадаў экспэрт.

Ён дадаў, што нават у Генштабе РФ гучаць тэзісы аб паразе ў вайне супраць Украіны.

Мабілізацыя, якую напярэдадні абвясціў кіраўнік Крамля Пуцін, таксама сітуацыю не выратуе.

«Мабілізацыя можа адыграць ролю мінімум за паўгода. І тое, пры ўмове, калі яны яе скончаць, збяруць гэтых мабілізаваных, сфармуюць з іх воінскія часці і падраздзяленні, правядуць поўны цыкл навучання аж да баявога ўзгаднення. Праўда слабым звяном у гэтым ланцужку можа стаць узбраенне тэхнікай, на якую яны іх пасадзяць. Гэта будзе састарэлая савецкая тэхніка, знятая з доўгатэрміновага захоўвання. Але на сённяшні дзень, можна канстатаваць, што стратэгічна ў гэтай вайне ўжо саступіла», - сказаў Жданаў.

Што да дапамогі з боку ЗША, Жданаў мяркуе, што ў Штатаў свой сцэнар гэтай вайны, «і яны не вельмі спяшаюцца».

«Мяркуючы з таго, як яны адцягвалі той жа лэндліз, як вельмі павольна пастаўлялі нам узбраенне, і толькі зараз пачалі паступаць больш-менш прыдатныя партыі да нашых запытаў. Думаю, што, магчыма, дзесьці там у глыбінях Белага дома, думаюць, што яшчэ не час даваць нам тыя ж ракеты ATACMS. Таму перыядычна ўсплываюць размовы і дэбаты што да выдачы або нявыдачы. Усё адно амерыканцы іх нам дадуць. Але крыху пазней. Не будуць жа на кожным перакрыжаванні стаяць вяшчальнікі і крычаць, што сёння тры танкі падалі, а заўтра дадуць яшчэ чатыры», - дадаў Жданаў.