Навукоўцы даведаліся, чаму васьміногі такія разумныя

Рэч у чалавечых генах.

Васьміногі сапраўды вельмі разумныя. Цяпер навукоўцы высветлілі, адкуль у гэтых малюскаў такія неверагодныя кагнітыўныя здольнасці.

Новае даследаванне паказала, што інтэлект галаваногіх малюскаў абумоўлены наяўнасцю ў іх такіх самых генаў, як і ў людзей, піша Techinsider.

Васьміногі – істоты з дасканалым розумам, і цяпер навукоўцы выявілі ключ, які можа часткова растлумачыць выдатны інтэлект галаваногіх малюскаў: іхнія гены. Падказкі, якія выявілі навукоўцы, называюцца "скаклівымі генамі", або транспазонамі. Яны складаюць 45% чалавечага геному. "Скаклівыя гены" – гэта кароткія паслядоўнасці ДНК, здольныя капіяваць і ўстаўляць або выразаць і ўстаўляць сябе ў іншае месца ў геноме. У некалькіх відаў яны былі звязаныя з эвалюцыяй геномаў.

Чалавечыя гены і інтэлект малюскаў

Як у людзей, так і ў васьміногаў большасць транспазонаў знаходзяцца ў стане спакою, альбо адключаныя праз мутацыі, альбо заблакаваныя ад рэплікацыі клеткавай абаронай. Але адзін від транспазонаў у людзей, вядомы як доўгія ўкрапаныя ядравыя элементы (Long Interspersed Nuclear Elements / LINE), усё яшчэ можа быць актыўным. Звесткі папярэдніх даследаванняў паказваюць, што "скаклівыя гены" з LINE жорстка рэгулююцца мозгам, але па-ранейшаму важныя для навучання.

Калі навукоўцы больш уважліва вывучылі "скаклівыя гены" васьміногаў, якія могуць свабодна капіяваць і ўстаўляць сябе па ўсім геноме, яны выявілі транспазоны з сямейства LINE. Гэты элемент быў актыўны ў вертыкальнай долі васьмінога – адрэзку мозгу галаваногіх, які мае галоўнае значэнне для навучання і функцыянальна аналагічны чалавечаму гіпакампу.

Вынікі гэтага даследавання не толькі звязваюць "скаклівыя гены" з інтэлектам васьмінога, яны таксама мяркуюць, што лінейныя транспазоны робяць больш, чым проста "скачуць". Яны выконваюць пэўную ролю ў апрацоўцы кагнітыўнай інфармацыі, выказалі здагадку аўтары працы. Паводле даследавання, паколькі "скаклівыя гены" з'яўляюцца агульнымі для людзей і васьміногаў, яны могуць быць добрымі кандыдатамі для будучых даследаванняў інтэлекту і таго, як ён развіваецца і змяняецца ў розных асобінаў унутры віду.