Генерал ЗША пра выбух у Польшчы: Неўзабаве стане вядома дакладнае месца, адкуль вылецела ракета

У Пшаводуве вядуць расследаванне ў тым ліку і амерыканскія спецыялісты.

На месцы падзення ракеты ў польскім Пшаводуве працуюць следчыя, сярод якіх ёсць амерыканскія спецыялісты.

Пра гэта паведамляе РБК-Украіна са спасылкай на заяву кіраўніка Аб'яднанага камітэта начальнікаў штабоў ЗША Марка Мілі, зробленую падчас прэс-канферэнцыі пасля сустрэчы Кантактнай групы ў абароне Украіны.

Генерал адзначыў, што неўзабаве стануць вядомыя новыя звесткі аб пункце паходжання ракеты, якая выклікала выбух у Польшчы.

«Будуць даступныя іншыя віды звестак, якія паступаюць з розных тэхнічных сродкаў, і я мяркую, што неўзабаве мы будзем мець пацверджаныя звесткі аб тым, якая мясціна паходжання, мясціна ўдару, пад якім кутом стаяла ўзброеная сістэма, якой была траекторыя палёту», - указаў Мілі.

У сваю чаргу, міністр абароны Злучаных Штатаў Лойд Осцін указаў, што амерыканцы падтрымліваюць шчыльную сувязь з польскімі калегамі і цалкам давяраюць польскаму ўрадаваму расследаванню.

«І якімі б ні былі канчатковыя высновы, свет ведае, што канчатковую адказнасць за гэты інцыдэнт нясе Расея», – дадаў чыноўнік.