Расейскія вайсковыя інструктары п'юць і дэбашыраць у беларускіх інтэрнатах

Людзям страшна выпускаць дзяцей са сваіх пакояў.

Чытачка Telegram-канала Беларускага аб'яднання рабочых распавяла пра паводзіны расейскіх вайсковых інструктараў, якіх засялілі ў беларускія інтэрнаты:

— Я з'яўляюся сведкай і міжвольнай удзельніцай абуральных фактаў амаральных і асацыяльных паводзінаў нашых «хаўрусных ваяк», якія цяпер знаходзяцца на тэрыторыі Беларусі і пражываюць побач.

Нядаўна ў наш інтэрнат засялілі грамадзян РФ. Паводле ўказання кіраўніцтва іх засялілі без адпаведнага афармлення, папрасілі толькі выдаць электронныя пропускі, забяспечыць камфортнае пражыванне і не распаўсюджвацца аб іх знаходжанні. Хто такія - канкрэтна невядома, апранутыя па-спартоваму, усім за 35 гадоў, вельмі падобныя на вайскоўцаў.

Як яны прагаварыліся, надаюць дапамогу вайскоўцам, з'яўляюцца кансультантамі і інструктарамі. Ужо былі ў іншых гарадах Беларусі.

Кожную ноч у пакоях ладзяцца гулянні, чутныя песні, салдафонска-басяцкія лозунгі і непрыстойная лаянка. У нядзелю ўвогуле прывялі з сабой некалькі жанчын. Тыя ў стане алкагольнага ап'янення блукалі па паверсе. Пры спробе зрабіць ім заўвагу па выкананні парадку, увайшоўшы ў памяшканне, была выяўленая сцэна інтымнага характару.

Мяне абурае факт таго, што я нямоглая ў гэтай сітуацыі, змушаная трываць і пакорліва назіраць гэта. Людзям страшна выпускаць дзяцей са сваіх пакояў без суправаджэння.

Кіраўніцтва інтэрната прымушае ўсіх маўчаць. Як далей жыць пад адным дахам з гэтымі «хаўруснымі жаўнерамі» – невядома.