У Віцебску выпаў першы снег

І нават утварылася снежнае покрыва.

17 лістапада ў Віцебску ўпершыню за восень выпаў снег і ўтварылася снежнае покрыва, пішуць «Народные новости Витебска».

Тэмпература ў абласным цэнтры пачала падаць яшчэ 16 лістапада, калі слупок тэрмометра апускаўся да -3,7°C. Уначы 17 лістапада тэндэнцыя да пахаладання захавалася і на віцебскай метэастанцыі зафіксавалі тэмпературу -5°C.

Да раніцы ў горадзе крыху пацяплела, але пры гэтым пайшоў снег. Паколькі тэмпература не паднялася вышэй -2,5°C, на паверхні стала ўтварацца снежнае покрыва.

Паводле прагнозаў сіноптыкаў, у ноч з 17 на 18 лістапада чакаецца таксама да - 5°C, у суботу крыху пацяплее, а ў нядзелю чакаецца да 9 градусаў марозу.