Андрэй Пянткоўскі: У Крамлі ўжо думаюць, як саступіць Украіне

Вайну можна спыніць адной пастановай дзядулі Джо.

Рыторыка Захаду ў дачыненні да Расеі імкліва мяняецца. Ёсць надзея, што гэта знойдзе і канкрэтны выраз ва ўжытых захадах па абароне Украіны ад ракетных нападаў РФ. А менавіта, перадача Кіеву дальнабойных ракет, якія змогуць паражаць вайсковыя цэлі глыбока ў тыле расейскай тэрыторыі. Але ў Расеі ўжо разумеюць сваё паражэнне і шукаюць шляхі адступлення.

Якіх пастаноў чакаць Украіне ад саміту NATO, чаму расейскія прапагандысты загаварылі аб Гаазе, ці атрымае Украіна дальнабойныя ракеты і знішчальнікі F-16 і як Расея рыхтуецца да сваёй паразы - у праграме «Руна. Вайна» на «Апострофе TV» распавёў палітолаг і публіцыст Андрэй Пянткоўскі.

- Саміт NATO ў Бухарэсце - што вы ад яго чакаеце? І што можаце сказаць наконт таго, што Вугоршчына зноў наклала права вета на ўдзел міністра замежных спраў Дзмітрыя Кулебы ў саміце кіраўнікоў МЗС краін NATO?

- Орбан не мае права выкарыстоўваць вета, там усё пасяджэнне прысвечанае Украіне. Гэты саміт я б назваў самітам NATO-2023 з удзелам Фінляндыі, Швэцыі і Украіны. Ну а Вугоршчына… Вялікай страты для бяспекі Еўропы не будзе, калі Вугоршчына там не будзе прысутнічаць.

Але адбылася яшчэ адна падзея. У Берліне засядалі міністры юстыцыі краін G7. Калі ў Бухарэсце мэта пасяджэння - як даць адпор чарговай хвалі пуцінскіх злачынстваў па знішчэнні інфраструктуры Украіны. Фактычна афіцыйна вуснамі Пяскова абвешчаная праграма генацыду ўкраінскага народа, калі ён сказаў, што калі ўлады Украіны хочуць спыніць пакуты ўкраінскага народа, то няхай неадкладна прымаюць законныя патрабаванні Расеі.

А ў Берліне абмяркоўваюць пытанне аб заснаванні Міжнароднага трыбунала над галоўнымі вайсковымі злачынцамі Расеі. І вельмі моцную заяву зрабіў міністр юстыцыі Нямеччыны. Ён сказаў, што акрамя Міжнароднага крымінальнага суда, які будзе займацца канкрэтнымі злачынствамі гвалтаўнікоў і забойцаў у Бучы, Ізюме, Херсоне і іншых украінскіх акупаваных гарадах, яшчэ неабходна стварыць трыбунал над ініцыятарамі гэтых злачынстваў - над вышэйшым вайскова-палітычным кіраўніцтвам Расеі.

У адказе на пытанне, а як міністр юстыцыі Нямеччыны ўяўляе сабе дастаўку абвінавачаных на пасяджэнне трыбунала, ён адказаў, што, калі гэтыя людзі будуць выязджаць за межы сваёй краіны, яны могуць быць арыштаваныя на падставе ордэра гэтага суда. А пасля паражэння Расеі гэтыя людзі будуць выдадзеныя новымі расейскімі ўладамі Міжнароднаму трыбуналу.

У апошнія дні мы назіраем зусім новы ўзровень рыторыкі Захаду ў дачыненні да Расеі. Вельмі спадзяемся, што гэты новы ўзровень рыторыкі знойдзе і канкрэтны выраз ва ўжытых захадах па абароне Украіны ад ракетных нападаў Расеі. Абараніць Украіну ад ракетных удараў можна не толькі і не столькі пастаўкамі сістэм ППА, колькі перадачай дальнабойных ракет, якімі можна наносіць удары у адказ як па базах, з якіх паднімаюцца расейскія стратэгічныя бамбавікі на тэрыторыі РФ, так і ў якасці захаду ў адказ па расейскіх гарадах. Калі ў Крамлі будуць разумець, што ўдар па Харкаве можа выклікаць удар у адказ па Маскве, яны тысячу разоў падумаюць перад нанясеннем такога ўдару.

- На расейскай тэлевізіі прапагандыстка Сіманьян вызначылася заявай аб тым, што калі Расея саступіць, то Гаажскі суд чакае нават дворніка з Крамля. Таму, на яе думку, неабходна бамбаваць украінскія гарады і нашу інфраструктуру.

- Проста яна цалкам справядліва бачыць сябе на лаве падсудных. Акрамя працэсу над галоўнымі вайсковымі злачынцамі будзе і працэс над вядучымі прапагандыстамі, які будзе ўпрыгожаны і некалькімі расейскімі дамамі - Скабеевай, Сіманьян, Захаравай.

- Тое, што яны заклікаюць бамбаваць гарады, для нас ужо не дзіўна. Але тое, што яны самі паднімаюць тэму Гаагі, азначае, што яны адчуваюць, што сітуацыя мяняецца не на іх карысць?

- Вядома адчуваюць, калі ў Берліне, як я казаў, міністры юстыцыі краін G7 абмяркоўваюць стварэнне Міжнароднага трыбунала. Але гэтую заяву яна зрабіла яшчэ да навін з Берліна - яна ж разумее, куды накіраваныя тэндэнцыі.

Усім давядзецца адказваць за свае злачынствы. Адзіным застаецца пытанне, як хутка? А на гэта могуць адказаць удзельнікі саміту NATO. Перамога Украіны бясспрэчная, а час яе рэгулюецца рукамі аднаго нерашучага чалавека сталага веку ў Белым доме, які ў кожны момант, а мы спадзяемся, што гэта будзе ў найбліжэйшы час, даць загад аб пастаўцы такой колькасці ўзбраення і такой наменклатуры, якая паводле прагнозаў майго «ўлюбёнага» расейскага генштабіста Міхаіла Хадаронкі, прывядуць да заканчэння вайны ў самыя кароткія тэрміны.

- Перад наступам на Украіну Расея ставіла ультыматум NATO аб непашырэнні да расейскіх межаў. Цяпер жа Енс Столтэнбэрг кажа, што пасля вайны дзверы NATO для Украіны адчыненыя. Геастратэг пуцін зноў усіх перагуляў і замест таго, каб мяжа NATO праходзіла дзесьці там, атрымае яе пад носам.

- Так, гэта залатыя словы Столтэнбэрга. Нарэшце Захад саспеў да ўсведамлення гістарычнага значэння расейска-ўкраінскай вайны і перамогі Украіны ў гэтай вайне. Столтэнбэрг яшчэ сказаў, што Еўропа плаціць кошт за гэтую вайну, але мы плацім грашыма, а ўкраінцы плацяць крывёй. І калі Украіна не выстаіць, і пуцін атрымае поспех, то ўжо Еўропа будзе плаціць гэтую высокую цану. Таму Украіне варта надаваць максімальную падтрымку.

І другая важная заява, што пасля перамогі Украіна стане паўнапраўным чальцом NATO.

- Прадстаўнік Пентагона Джон Кірбі таксама сказаў, што пуцін паводзіць сябе агідна. Праз тое, што ён нічога не можа зрабіць на фронце, ён адыгрываецца на цывільных. І ёсць прагнозы, што неўзабаве Расея зноў можа зладзіць масавы ракетны абстрэл. Але для чаго? Каб стварыць ва Украіне калапс, паніку?

- Ён назваў яго паводзіны мярзотнымі. Адбываецца тэктанічнае змяненне ў свядомасці Захаду і яно з кожным днём мацнейшае. Засталося, каб гэтая змена перарасла ў перадачу дальнабойных ракет Украіне.

У іх жа ў рэзалюцыі ўжо ўсё напісанае: абараніць Украіну ад ракетных нападаў Расеі. Проціпаветраная абарона - гэта добра, але на гэта трэба час, і яна не стоадсоткава абараняе. Можна заўтра абараніць Кіеў, але, каб стварыць інтэграваную сістэму па ўсёй краіне - гэта час. А можна адной пастановай ЗША спыніць гэтыя ракетныя напады, падаўшы зброю, якая будзе біць па той жа Маскве і аэрадромах, з якіх паднімаюцца стратэгічныя бамбавікі.

На саміце ў Бухарэсце Кулеба сказаў, што будзе ставіць пытанне аб пастаўках Украіне танкаў і авіяцыі, і былі вельмі абнадзейлівыя выцекі інфармацыі аб магчымасці перадачы з Польшчы як савецкіх самалётаў, так і амерыканскіх F-16.

- У чарговы раз выскачыў Мядзведзеў з пагрозай, што, калі NATO перадасць Украіне ЗРК Petriot, яны стануць законнай цэллю для РФ.

- У Пентагоне мараць, каб у Расеі нарэшце палічылі нешта на тэрыторыі краін NATO законнай цэллю. І тады яны развяжуць сабе рукі і здымуць праклён свайго самаабмежавання - перадаваць Украіне агнявыя сродкі, якія могуць біць па тэрыторыі Расеі. Яны і самі змогуць тады ўдарыць.

- Ці перададуць нам знішчальнікі F-16, бо мы чуем супярэчлівую інфармацыю з гэтай нагоды? Але мы ж разумеем, што дасягнуць поспеху на фронце можна, атрымаўшы шырэйшую наменклатуру зброі.

- Вы ўспомніце, якая страшная дыскусія была ў Амерыцы наконт таго, перадаваць Украіне Javelin ці не. Казалі, што гэта ж амаль наступальная зброя, якая можа справакаваць пуціна. «Ён ядзерную бомбу на нас скіне», - крычала ўся расейская агентура. Потым былі дыскусіі аб перадачы Stinger, потым гаўбіц, потым HIMARS. Амерыка ўвесь час праходзіць шлях сумневу, але ўсё заўсёды сканчаецца на нашу карысць.

Чэрчыль калісьці сказаў, што на амерыканцаў можна спадзявацца, яны заўсёды прымуць правільную пастанову, але пасля таго, як паспрабуюць усе астатнія сродкі. Вось і цяпер у ЗША працягваюцца ваганні, але мне здаецца, што пуцін ім дапаможа пераадолець гэтыя сумневы атакамі на ўкраінскія гарады.

Рыторыка Захаду, як я казаў, моцна мяняецца і пасля адкрыццяў Пяскова, і вось Лукашэнка ўжо, які на саміце ў Ерэване развіў думку Пяскова. Ён жа сказаў, што, пачынаючы так званую адмысловую ваенную аперацыю, пуцін паставіў мэтай - знішчэнне ўкраінскай дзяржавы. А цяпер ён паставіў ужо іншую мэту - знішчэнне ўкраінскага народа. Таму ён рэкамендуе, ужо паўтараючы Пяскова, што, калі не хочаце знішчэння народа, знішчайце сваю дзяржаву. Гэта ў самай чыстай форме пасланне пуціна свету. Украінскае насельніцтва альбо павінна адмовіцца ад сваёй дзяржавы, альбо быць знішчаным.

Але, ведаеце, можна выставіць шмат папрокаў сучаснаму Захаду, але памылка Крамля ў тым, што яны самі нягоднікі і думаюць, што вакол іх усё такія ж. Але гэта не так. Я думаю, што пасля сустрэч і ў Берліне, і ў Бухарэсце ў нас з'явяцца падставы павіншаваць Захад з рухам у правільным кірунку.

– Расейцы ўжо не хаваючы кажуць пра тое, што трэба бамбаваць украінскія гарады, што калі не будзем забіваць мірнае насельніцтва, нас пасадзяць…

- Гэта ўсё абвастраецца страхам. Яны бачаць сваю паразу і бачаць суд над вайсковымі злачынцамі. Вось Столтэнбэрг казаў аб прыёме Украіну ў NATO, калі яна атрымае перамогу, там нават не сумняваюцца ў самім факце гэтага.

Вось і міністры юстыцыі абмяркоўвалі не тое, пераможа Украіна Расею ці не, і ці будуць прыцягнутыя да адказнасці Пуцін, Лаўроў, Мядзведзеў, Патрушаў і іншыя. Яны разважалі аб тэхніцы іх прыцягнення, як яны будуць дастаўленыя ў суд.

- А Кітай выдасць пуціна, калі ён туды паляціць?

- Ён паляціць, а Кітай потым яго прадасць за нейкае зніжэнне тарыфнай стаўкі на экспарт кітайскіх чыпаў у ЗША.

- Зіма стане пікам супрацьстаяння ва Украіне? Адны гавораць, што інтэнсіўнасць баявых дзеянняў будзе замарожаная, іншыя гавораць, што гэтага нельга дапусціць, бо гэта дасць час пуціну перападрыхтавацца.

- Мне здаецца, што баявыя дзеянні актывізуюцца ў сярэдзіне снежня, калі глебу падмарозіць. А наколькі хутка будзе развязаны лёс вайны, залежыць ад ЗША найперш і Захаду агулам. Гэта значыць, не зыход вайны, а хуткасць наступлення гэтага зыходу.

- У апошні час зноў пачала паднімацца тэма вызвалення Крыма, як гэта будзе адбывацца: ваенным шляхам, палітычна ці партызанская вайна там будзе. Як гэта ўсё будзе выглядаць у канчатковым выніку, ці ў Захаду пакуль няма бачання на гэты конт?

- Ды не, у Захаду ёсць бачанне, і ва ўкраінцаў ёсць бачанне. Звярніце ўвагу, наколькі Крым перайшоў са сферы палітыка-дыпламатычнага вызвалення, у чыста ваенную. Высветліўся адзін факт, што Крым у плане дэакупацыі значна больш лёгкая дасягальная цэль для ўкраінскага войска, чым Данбас. Відавочна, што наступ з Запарожжа на Мелітопаль і далей на ўзбярэжжа імгненна стварае велізарны крымска-херсонскі кацёл, у якога адзінай лініяй сувязі застаецца Крымскі мост, які апынуўся вельмі нават уразлівым. І гэта значна лягчэйшы шлях да перамогі, чым прабіваць умацаванні на Данбасе.

Я думаю, што наступ на Крым прывядзе да палітычных наступстваў, да падзення рэжыму або яго гатоўнасці да капітуляцыі, і за Данбас тады ўжо не давядзецца змагацца. А Крым жа ўсе бралі, хто жадаў, яго ніхто не мог абараніць.

- Ці ёсць нейкі кансэнсус у Захаду наконт далейшага лёсу пуціна? Бо час ад часу выходзяць з заявамі то Эрдаган, то Орбан, што пуціну трэба даць захаваць твар.

- Орбану трэба думаць аб сваім твары і сваёй задніцы. Для яго гэта больш актуальная тэма, чым твар Пуціна.

Так, крамлёўская агентура на Захадзе ўжо палохае сваёй слабасцю. Маўляў, яны разумеюць, што ў вайне саступілі і пуцін сыдзе, але калі мы ўсе сыдзем, абрынецца ўся ўлада і застанецца вялізная Расея, пачнецца грамадзянская вайна, расейская смута. Вось гэтым яны палохаюць цяпер.

Раней палохалі сваёй моцай, а цяпер палохаюць расейскай смутай. Частка амерыканскіх палітыкаў рэагуе на гэта, але вось іншы аргумент, які ідзе з Расеі, што яны будуць павялічваць пакуты ўкраінскага народа, пакуль ён не капітулюе - робіць большае ўражанне. І ці будзе для заходняй свядомасці важней асцярожная і кіраваная капітуляцыя Пуціна, за што давядзецца заплаціць дзясяткамі тысяч жыццяў украінцаў. І вось неўзабаве павінна быць прынятая нейкая пастанова, а ў снежні, мне здаецца, адбудзецца вызначальная партыя.