Украінскае войска ўшчыльную падышло да Крамянной

Акупанты разумеюць, што горад ім не ўтрымаць.

Украінскія ваяры ўжо ўшчыльную падышлі да часова акупаванай захопнікамі Крамянной у Луганскай вобласці. Паколькі ў вобласці пачынае прамярзаць зямля і тэхніка зможа прасоўвацца хутчэй - неўзабаве можна чакаць добрых навін аб гэтым населеным пункце, і гэта разумеюць нават расейскія акупанты.

Дэакупацыя Крамянной адкрывае для ўкраінскіх ваяроў дарогі на Сватава, Севераданецк і Рубежнае. Пра гэта ў эфіры агульнанацыянальнага тэлемарафону распавёў кіраўнік Луганскай абласной ваенна-грамадзянскай адміністрацыі Сяргей Гайдай.

Ён зазначыў, што ў Луганскую вобласць паступова прыходзіць зіма. І калі раней па размытай зямлі ўкраінская тэхніка не магла прасоўвацца наперад, то зараз глеба павольна прамярзае. Калі варункі надвор'я не зменяцца, найбліжэйшым часам цяжкая тэхніка зможа дастаткова хутка прасоўвацца.

Пакуль жа ўкраінскія ваяры ўжо падышлі практычна ўшчыльную да Крамянной.

«Нашы ваяры ўжо дастаткова блізка каля Крамянной, мы паказвалі відэа з падстанцыі Крамянскай, а гэта літаральна пару кіламетраў ад самога населенага пункта. Вельмі спадзяюся, што найбліжэйшым часам нашы Узброеныя сілы Украіны парадуюць нас добрымі навінамі - дзякуючы надвор'ю», - распавёў Гайдай.

Ён адзначыў, што непазбежнасць дэакупацыі Крамянной відавочная нават для акупантаў.

«Расейцы разумеюць дакладна, што Крамянную яны не ўтрымаюць. Недзе ёсць нейкія прыкметы, што яны гэта разумеюць, улічваючы тое, што мы бачым, што каля Старабельска, а гэта значна далей углыб Луганскай вобласці, яны будуюць другую магутную лінію абароны. Выразна разумеюць, што Крамянная найбліжэйшым часам будзе дэакупаваная УСУ», - падкрэсліў кіраўнік Луганскай АУВ.

У той жа час вызваленне Крамянной адкрывае для УСУ дарогі на буйныя гарады Луганшчыны, перш за ўсё - на Рубежнае.

«Ад Крамяной ідуць дарогі ў розныя кірункі. Гэта і кірунак Сватава, і кірунак на нашы гарады - Рубежнае, Севераданецк. І ў прынцыпе там Рубежнае зусім побач. Горад не можа быць паўнавартаснай цытадэллю. Таму што акупанты пасля 24 лютага, калі пачалося поўнамаштабнае ўварванне РФ - яны 50% горада разбурылі цалкам, таму замацоўвацца яны там не будуць, трымаць абарону доўга гэтак жа не будуць, тым больш што матывацыя зусім розная ў вайскоўцаў нашых і ў акупантаў. Мы бачым, што як у іх дзесьці якая-небудзь хоць крыху пагроза набліжаецца, то яны ў прынцыпе не трымаюць абарону, а больш уцякаюць», – адзначыў Гайдай.

Зрэшты, у кожным выпадку перад украінскімі ваярамі стаіць складаная задача.

«Не будзе ўсё адно гэта лёгкім шпацырам для нашых вайскоўцаў, бо вялізную колькасць асабовага складу прывезлі ўжо на тэрыторыю Луганскай вобласці акупанты, і вялізная колькасць тэхнікі. Таму - я гэта казаў ужо шмат разоў і магу паўтарыць - кожны метр Луганшчыны даецца вельмі-вельмі цяжка», - падкрэсліў кіраўнік ЛАВА.