Хвалебныя песні пра Лукашэнку складае ягоная нявестка

Імітаваць «усенародную любоў» да дыктатара даводзіцца ягонай сям'і.

Аналітык Сяргей Чалы расказаў, хто такая паэтка Ганна Сялук – аўтарка мноства песняў на дзяржаўных канцэртах, піша «Салiдарнацсць».

Як адзначыў Сяргей Чалы ў праграме на Youtube, у жанры «карпаратыў для сілавікоў» Ганнай Сялук напісаныя песні для МУС, войска, МНС, а таксама гімн Генпракуратуры.

Пра саму паэтку, як сказаў аналітык, «вядома злачынна мала» – толькі імя Ганна Сялук. Пры гэтым з ёй няма ні відэа, ні фота. Адзінае інтэрв'ю паэтка дала скандальнай «Менскай праўдзе» з ілюстрацыяй у выглядзе самотнага мікрафона.

Чалы звярнуў увагу: нягледзячы на тое, што паэтка, паводле ейных словаў, пачала пісаць песні ўсяго два гады таму, яна змагла за гэты час дабрацца «да самай вяршыні прыдворных трубадураў».

Сярод яе апошніх песняў – «Ах, Аляксандр» і «Бульба дэнс». У кліпе апошняй выкарыстаная хроніка з Лукашэнкам, які збірае бульбу, на што, натуральна, павінен быць дазвол з самага верху.

Больш за тое, цяпер песню прасоўваюць з выкарыстаннем адміністрацыйнага рэсурсу – напрыклад, паказваюць у кінатэатрах перад фільмамі.

Дык хто ж такая Ганна Сялук? Чалы звярнуў увагу на яе месца працы – ТАА «Музычная медыякампанія», дзе намесніцай дырэктара працуе Таццяна Кулакова, сталая спадарожніца Ганны Лукашэнкі, жонкі Дзмітрыя Лукашэнкі. У сацсетках яна пісала пра «непублічную» сястру, у якой «супер-мега талент».

Ганна Сяргееўна Лукашэнка – скарочана Ганна Ся-лук, адзначыў аналітык. Акрамя таго, ятроўцы кіраўніка таксама 42 гады, як і паэтцы.

У інтэрв'ю Ганна Сялук згадала пра свайго дзядулю Цэханскага Віктара Іванавіча, які ў Вялікую Айчынную вайну пайшоў ваяваць сямнаццацігадовым хлопцам. Ён з'яўляецца дзядулем Ганны Лукашэнкі паводле матчынай лініі, адзначыў аналітык.

– Чарговы раз мы пераконваемся, што для імітацыі любві і падтрымкі Аляксандра Лукашэнкі патрабуецца ўдзел людзей з самага блізкага кола самога Лукашэнкі.

Як Наталля Эйсмант і Зміцер Баскаў палявалі на стужачкі ў пратэставых дварах, імітуючы ўсенародны рух, так і вернападданніцкія песні складае ягоная ж нявестка, – сказаў на заканчэнне Чалы.