Белорусов начали готовить к аварии на БелАЭС с утечкой радиации

Зацверджаны план «ёднай прафілактыкі».

У Беларусі зацверджаная інструкцыя аб парадку арганізацыі і правядзення ёднай прафілактыкі ў выпадку пагрозы або ўзнікнення радыяцыйных аварый. Адпаведная пастанова апублікаваная на Нацыянальным прававым інтэрнэт-партале.

«Пад ёднай прафілактыкай разумеецца ёднае блакаванне шчытападобнай залозы шляхам увядзення лекавага прэпарату стабільнага ёду (далей – прэпарат стабільнага ёду) для прадухілення або памяншэння паглынання радыеактыўных ізатопаў ёду шчытападобнай залозай пры пагрозе або ўзнікненні радыяцыйнай аварыі. Асноўным прэпаратам стабільнага ёду для правядзення ёднай прафілактыкі з'яўляюцца таблеткі калію ёдыду. Рэзервовым прэпаратам стабільнага ёду з'яўляецца 5% спіртавая настойка ёду», – гаворыцца ў дакуменце.

Планаванне мерапрыемстваў у арганізацыі і правядзенні ёднай прафілактыкі ажыццяўляецца з улікам вызначаных аварыйнымі планамі аб'ектаў зонаў (радыусаў) аварыйнага планавання:

зона папераджальных захадаў: для Беларускай атамнай электрастанцыі радыус – 3 км;

зона планавання тэрміновых ахоўных захадаў: для Беларускай АЭС радыус – 15 км, для АЭС, размешчаных на тэрыторыі суседніх дзяржаваў, радыус – 30 км;

радыус пашыранага планавання для Беларускай АЭС, а таксама дзейных АЭС, размешчаных на тэрыторыі суседніх дзяржаваў (Ровенская АЭС, Смаленская АЭС), – 100 км.

У дакуменце таксама ўказана, што апавяшчэнне насельніцтва пра пачатак і правядзенне ёднай прафілактыкі ажыццяўляецца ўсімі відамі сувязі і абвесткі з удзелам сродкаў масавай інфармацыі, а выдача насельніцтву прэпаратаў стабільнага ёду будзе праводзіцца ў пунктах выдачы прэпаратаў стабільнага ёду ў загадзя вызначаных месцах.