Беларускім чыноўнікам можа пагражаць пажыццёвае зняволенне за арганізацыю нелегальнай міграцыі
18- 15.02.2022, 21:47
- 20,038
Польская пракуратура пачала расследаванне.
Ад 3 месяцаў да 25 гадоў пазбаўлення волі ці пажыццёвае зняволенне могуць атрымаць беларускія службовыя асобы, якія ўдзельнічалі ў дастаўцы мігрантаў на мяжу Беларусі, калі расследаванне польскай пракуратуры дакажа іхняе дачыненне да трафіку людзей па беларускай тэрыторыі, паведамляе «Белсат».
У раённай пракуратуры Варшавы пачалося расследаванне, якое можа даказаць, што міграцыйны крызіс на мяжы Беларусі быў арганізаваны. Польская пракуратура распачала крымінальную справу ў тым ліку ў дачыненні да беларускіх службовых асобаў за арганізацыю нелегальнай міграцыі. У аснову справы ляглі паказанні грамадзянаў Сірыі, якіх затрымалі на мяжы ў верасні мінулага года.
Human Rights Watch апублікаваў даклад, у якім падрабязна апісаны шлях мігрантаў да беларускай мяжы. З аповедаў апытаных, турфірмы на Блізкім Усходзе праз сацсеткі рэкламавалі пакетныя туры ў Менск. У кошт «пакету» ўваходзіла віза, абавязковая страхоўка, трансфер да мяжы Беларусі. Кошт вагаўся ад 3 да 17 тысячаў даляраў. Тых, хто набываў такія пакетныя туры, сустракалі ў аэрапорце Менска агенты з аўтобусамі, развозілі людзей па гатэлях, дзе яны чакалі трансфер на мяжу. Кіроўца трансферу высаджваў пасажыраў у вызначаным месцы, ім выдавалі GPS-каардынаты пунктаў на мяжы, куды ім трэба было выйсці. Там іх сустракалі беларускія памежнікі, самі пераразалі калючы дрот ці паказвалі гатовы праход на польскую тэрыторыю.
40-гадовая курдская жанчына Авір з Сірыі расказала валанцёрам Human Rights Watch: «Яны [турагенты] увесь час паўтаралі, што ўсё будзе добра. Нас выкарыстоўвалі як галлё для вогнішча, а мы апошняе прадавалі ў надзеі на лепшае жыццё. Цяпер і вяртацца няма куды».
Такі прывабны шлях прывёў на мяжу Беларусі з ЕЗ некалькі тысячаў мігрантаў. Але простага пераходу не атрымалася. У выніку ў дакладзе Human Rights Watch пазначаныя мінімум 13 загінулых, некалькі польскіх жаўнераў атрымалі раненні.
«У рамках гэтай справы можна вылучыць тры асноўныя пытанні, якія мы аналізуем. Па-першае, гэта агрэсіўныя дзеянні супраць Польшчы і яе суверэнітэту. Па-другое, прааналізуем дзейнасць міжнароднай злачыннай групы, у якую ўвайшлі прадстаўнікі беларускіх спецслужбаў. Яны садзейнічалі працэсу нелегальнай міграцыі ў Польшчу і ажыццяўлялі сваю дзейнасць, у тым ліку, для ўзбагачэння. Таксама мы будзем аналізаваць удзел беларускіх публічных дзеячаў у арганізацыі нелегальнай міграцыі ў Польшчу і Еўразвяз», – растлумачыў прэс-сакратар Варшаўскай акруговай пракуратуры Лукаш Лапчынскі.
Калі падчас следства будзе даказана, што беларускія службовыя асобы маюць дачыненне да арганізацыі нелегальнай міграцыі, ім пагражае ад 3 месяцаў да пажыццёвага зняволення ў залежнасці ад артыкула і ступені ўдзелу. Але ці будуць рэальныя наступствы для чыноўнікаў з іншай дзяржавы?
«Безумоўна, міжнародныя механізмы ёсць. Па-першае, усім вядомы – вышук праз Інтэрпол. Цяпер для гэтага ёсць падставы: таму што ў паведамленні польскай пракуратуры сказана, што ёсць канкрэтныя падазроныя. І тое, што іхнія імёны не пазначаныя, магчыма, гэта якраз для таго, каб гэтыя асобы не мянялі планаў сваіх паездак», – расказаў юрыст Народнай антыкрызіснай управы Міхаіл Кірылюк.
Х’юман-трафік, або арганізацыя нелегальнай міграцыі – гэта міжнароднае злачынства, і Польшча мае права – і нават абавязаная – гэтае злачынства расследаваць і караць тых, хто мае дачыненне. Крымінальная справа распачатая, а гэта значыць, што любыя доказы дачынення беларускіх службовых асобаў да стварэння міграцыйнага крызісу на мяжы будуць узятыя да ўвагі.