«Кошты ляцяць, як ракета ў космас»

Беларусы распавялі, як выкручваюцца, калі ўсё навокал даражэе.

На фоне падаражання тавараў, падзення курсу рубля і ў цэлым неспрыяльнай сітуацыі ў эканоміцы некаторыя беларусы пачалі пераглядаць свой прадуктовы кошык — купляць таннейшыя прадукты, адмаўляцца ад дарагіх, піша zerkalo.io.

У гэтай сітуацыі некаторыя ўспамінаюць прызабытыя ўжо хітрыкі і рэцэпты часоў СССР - хатнія нарыхтоўкі, эканомію на стрыжках, сланечнікавы алей замест крэму для твару. «Калі ёсць курыны кумпяк, то вару на ім булён, потым абдзіраю з яго мяса і здрабняю, плюс смажаную цыбулю і варанае яйка: атрымліваецца начынне для блінцоў», — распавядае мянчанка. Чытачы падзяліліся сваімі сакрэтамі, як зэканоміць, калі «кошты ўзлятаюць уверх, як ракета ў космас». Прычым даходы ў іх розныя: у кагосьці - 700 рублёў, а ў кагосьці - 4000 рублёў у месяц. Спосабы эканоміць таксама адрозніваюцца.

Сямейная пара з 1100 рублёў на дваіх: «Ужо не ходзім на перакусы ў кавярні і бары, харчуемся дома»

20-гадовая студэнтка Аляксандра з Менска і яе хлопец (ён таксама вучыцца ў ВНУ) паўтара года жывуць разам ва ўласнай кватэры, за якую камуналку аплочваюць іх бацькі. У пары ёсць даход - 1100 рублёў, гэтымі грашыма яны распараджаюцца на сваё меркаванне.

- Праз тое, што ў апошні час кошты ўсяго падняліся, мы перагледзелі свае выдаткі. Ужо не ходзім на перакусы ў кавярні і бары, харчуемся дома. Прадукты закупляем у крамах, прычым, глядзім, дзе тавары таннейшыя. Ад памідораў і грыбоў адмовіліся цалкам - не пацягнем, дорага, - распавяла дзяўчына.

Затое зараз на «ўра» ў моладзі заходзяць бабуліны хатнія кансервы. Яшчэ яны зрабілі запасы солі і цукру - баяліся, што гэтыя прадукты знікнуць з прылаўкаў і падаражэюць. А ў красавіку разам з бацькамі Аляксандры, яе цёткамі, бабуляй і дзядулем яны плануюць купіць палову кабана і разабраць яго. Гавораць, што палова вагой амаль 65 кілаграм абыдзецца ў 600 рублёў.

- Мае бацькі раней гэта таксама рабілі, але мы не ўдзельнічалі - грошай ставала на мяса з крамы. Цяпер зразумелі, што ўжо не хопіць. Таму далучымся і мы. Наробім каўбас, фаршу, паляндвіц, яшчэ шмат чаго, запоўнім усю лядоўню і нам хопіць надоўга.

У пары дома жывуць кот і сабака, выдаткі на іх сталі больш рацыянальныя. Напрыклад, калі раней напаўняльнік для кацінага латка куплялі ў мас-маркеце за шэсць - восем рублёў, то цяпер у краме Fix Price - за два рублі.

Мянчанка з заробкам у 700 рублёў: «Блінцы на вадзе зрабіць можна за капейкі»

Мянчанцы Ульяне 54 гады, яна працуе санітаркай у прыватным медцэнтры, атрымлівае заробак амаль 700 рублёў. Жанчына кажа, што яе «палучка» вышэйшая, чым у калег у дзяржарганізацыях, але жыць на яе складана, бо «кошты ляцяць, як ракета ў космас». Да таго ж у яе дачка-студэнтка, таму «даводзіцца выкручвацца і рабіць цукерку з нічога».

Ульяна кажа, што ў яе і ў дачкі «ніколі не было кароны на галаве», таму яны жывуць проста - адзенне купляюць на недарагім рынку або ў сэкандзе, нешта перашываюць. Жанчына і яе дачка ўмеюць вязаць, таму заўсёды можа зрабіць сабе нешта новае са старых нітак. У ежы яны непатрабавальныя, сілкуюцца простымі стравамі.

- Суп у нас ёсць заўсёды - гэта самая танная страва, зрабіць можна з нічога. Калі мяса няма - вару ў рондалі спачатку гародніну, калі яна амаль гатовыя, уліваю туды смажанае сала з морквай і цыбуляй. Калі ёсць курыны кумпяк, то з яго можна зрабіць дзве стравы: вару на ім булён, потым абдзіраю з яго мяса і здрабняю, плюс смажаная цыбуля і варанае яйка: атрымліваецца начынне для блінцоў. А блінцы на вадзе зрабіць можна за капейкі, - дзеліцца сваімі рэцэптамі Ульяна.

Жанчыну вельмі часта запрашаюць да сябе на лецішча сяброўкі: яна ім дапамагае на агародзе, а яны з ёй потым дзеляцца ўраджаем, таму гародніна, яблыкі, ягады, зеляніна ў хаце ёсць заўсёды, стае і на нарыхтоўку на зіму.

- Я не хаджу на манікюр і педыкюр, з тавараў для прыгажосці магу сабе дазволіць толькі недарагія крэмы, часта - просты дзіцячы крэм, магу твар проста сланечнікавым алеем нашмараваць замест крэму. Замест тоніка выкарыстоўваю замарожаны ў лёд адвар з травы, якую нарыхтоўваю летам, маскі для твару з аўсянкі, кавалачка агурка. А стрыжэ мяне дачка - у яе добра атрымліваецца.

Вядома, беларуска крыху хвалюецца праз тое, што не можа забяспечыць сваю дачку тымі дабротамі, што маюць іншыя дзеці. Але Ульяна спадзяецца, што праз пару гадоў, калі дачка будзе вучыцца на старэйшых курсах, яна ўжо зможа падзарабляць і іх фінансавая сітуацыя стане лепшай.

Банкаўскі работнік з заробкам у 4000 рублёў: «BMW паставіў на прыкол, хамон зраблю сам»

Мянчаніну Ігару 35 гадоў. Яго апавяданне выдзяляецца на фоне гісторый астатніх герояў гэтага тэксту. Ён працуе ў банкаўскай сферы і атрымлівае заробак чатыры тысячы рублёў. Такому заробку могуць пазайздросціць многія беларусы. Аднак Ігар кажа, што нават з такім прыбыткам вымушаны эканоміць.

- Гэта толькі здаецца, што заробак вялікі. Я ж з яго выплачваю крэдыт на кватэру. Да таго ж я прывык да пэўнага ўзроўню жыцця, але праз павышэнне коштаў мне прыйшлося пераглядаць свае выдаткі, - растлумачыў Ігар.

Першае, у чым прыйшлося зэканоміць мужчыну паставіць на прыкол свой BMW 5 Series Gran Turismo і перасесці на грамадскі транспарт. Кажа, што пасля таго, як абслужыў на 1000 рублёў сваё аўто, зразумеў, што пражэрлівы 3,5-літровы рухавік бензінам ужо «не ўкорміць».

- Па прадуктах я таксама скараціўся: памідоры па 11 рублёў купляю не ў такіх колькасцях, як раней. На салаты бяру бурак і рэдзьку. Цалкам адмовіўся ад груш, затое яблыкі яшчэ пакуль ем, яны хоць і падаражэлі, але ў Green ёсць па два з паловай рублі. Вось што для мяне вельмі непрыемна - з продажу знікла чышчаная бульбачка ў вакууме. Так, яна даражэйшая і я б яе купляў, бо выкарыстоўваць яе вельмі зручна. Заўважыў, што раней праз дастаўку мае звычайныя прадукты каштавалі 100 рублёў, зараз - 150 рублёў.

Ігар вельмі любіць з сябрамі «папіць вінца з хамонам», але зараз ён баіцца, што сродкаў на далікатэс не хопіць, а таму вырашыў паспрабаваць засаліць мяса сам. Спачатку паэксперыментаваў на курыным філе - атрымалася не горш, чым тое, якое ён купляў на рынку па 22 рублі за кілаграм, а па кошце танней больш чым удвая. На чарзе да засолу - тазасцегнавая частка свініны.

- Я рады, што многія рэчы паспеў купіць яшчэ да падаражання: дзве пары фірмовых красовак, джынсы Big Star. Купіў смартфон Samsung за 2100 рублёў, а зараз ён каштуе 2600 рублёў.

Жыхарка абласнога цэнтра: «Я родам з СССР, умею выжываць і рабіць усё»

У 2014 годзе Марыя з сям'ёй пераехала з Казахстана ў адзін з абласных гарадоў Беларусі, у яе два сыны — 27 гадоў і 9 гадоў. Старэйшы сын жыве ў сваёй кватэры, але паесці прыходзіць да бацькоў. Для кампенсацыі за прадукты штомесяц ён уносіць у агульны «кацёл» 350 рублёў. Плюс да гэтага заробак мужа - 1000 рублёў, яшчэ ёсць даход з дэпазіту - 600 рублёў у месяц (нагадаем, цяпер банкі прымаюць рублёвыя дэпазіты ў сярэднім пад 20% гадавых). Сама Марыя не працуе.

- Грошай няшмат, але я родам з СССР, умею выжываць і рабіць усё, - кажа Марыя.

Тры гады таму муж і жонка купілі лецішча, тут ёсць агарод, высаджаны хмызнякі і пладовыя дрэвы. Марыя гаворыць, што вырошчваюць практычна ўсё, што расце ў беларускім клімаце. Сабраны ўраджай замарожваюць і кансервуюць.

- Салёныя агуркі і памідоры, кабачковая ікра, салаты з маслам, узвары, варэнне. Я з восені накрываю слоікі. Заўсёды атрымліваецца шмат. Але сёлета я зраблю яшчэ больш - таму што кошты якія на ўсё ў краме! Вунь ужо расада каласіцца на акне.

На мясных прадуктах сям'я не эканоміць - купляюць свіную карэйку, курыцу. А вось ад свежай несезоннай гародніны і садавіны яны адмовіліся — для сям'і яны недаступныя па кошце.

Жанчына расказвае, што ў доме яны заўсёды сям'ёй робяць сваімі рукамі — гэта вельмі эканоміць сродкі. Напрыклад, у студзені захацелі зрабіць касметычны рамонт - зрабілі. Праўда, мэблю ўсю памяняць не паспелі, «а цяпер ужо, з такімі коштамі, і не памяняем». Марыя ўмее вязаць і шыць, але пакуль да рукадзелля прыбягаць яшчэ не давялося.

- На жаль, мы цалкам адмовіліся ад розных забаў. Напрыклад, раней малодшага сына я ўвесь час вадзіла ў дзіцячыя гульнявыя пакоі, а цяпер гэтага зрабіць мы не можам.