Як сыход Visa і Mastercard адаб'ецца на эканоміцы Расеі

Санкцыяваныя банкі РФ адключылі ад сусветнай сістэмы плацяжоў SWIFT.

З уварваннем Расеі ва Украіну 24 лютага дзясяткі кампаній адмовіліся працаваць у Расеі, а краіны Захаду ўвялі ў дачыненні да РФ маштабныя санкцыі. Санкцыянаваныя банкі адключылі ад сусветнай сістэмы плацяжоў SWIFT.

Напярэдадні, 5 сакавіка, плацежныя сістэмы Visa і Mastercard прыпыняюць дзейнасць у Расеі. Карты, выпушчаныя ў Расеі, будуць працаваць на тэрыторыі краіны, за межамі Расеі карты працаваць не будуць. Таксама нельга будзе аплачваць замежныя анлайн-сэрвісы, карты, выпушчаныя замежнымі банкамі, не будуць працаваць у Расеі.

Эканаміст Уладзімір Патапенка распавёў у спецэфіры «Настоящего времени», чым абернецца рашэнне плацежных сістэм для расейцаў і як сыход кампаній паўплывае на беспрацоўе ўнутры краіны.

- Як вам пастанова Visa і Mastercard?

- Калі казаць аб пастанове яшчэ двух прыватных кампаній, я толькі магу сказаць, што гэта дзіўна, калі ў гэтую антываенную кааліцыю ўваходзіць усё больш і больш прыватных кампаній, што для мяне не тое каб відавочна, а гэта нармальна ў XXI стагоддзі з тымі выклікамі, якія ёсць, калі яны аб'ядноўваюцца і паказваюць сваімі паводзінамі, як яны ставяцца да любой вайсковай агрэсіі, аперацыі - як бы мы яе ні назвалі - у дачыненні да суседняй дзяржавы.

Я як мінімум тры гады кажу пра тое, што парадыгма пытання: «Дзяржава, а ты ўвогуле хто?» - яна адбылася гады тры-чатыры таму. І прыватнікі ў гэтым выпадку паказваюць тое, што яны павінны паказаць: «Таварышы ад дзяржавы, вы ўвогуле, шчыра кажучы, не спраўляецеся ні з якімі крызісамі: ні з каранавірусным крызісам, ні з вайсковымі аперацыямі».

- Мне здаецца, адна справа, калі сыходзіць сетка рэстарацый або сетка крам адзення - гэта не радуе, але гэта не крытычна дрэнна. Іншая справа - калі дзве найбуйнейшыя плацежныя сістэмы, на якіх прыпадае практычна ўся частка рынку ў Еўропе і заходнім свеце, аб'яўляюць, што перастаюць працаваць у Расеі. Гэта значыць, калі карты скончацца, яны зусім сыдуць. Ці можна казаць, што гэта катастрофа для эканомікі ці для спажыўцоў?

- Тут таксама не трэба пераходзіць у іншую частку. Большая частка нашых суграмадзян, прабачце, у Еўропе не былі і ўвогуле туды не выязджаюць. У нас замежныя пашпарты мель блізу 6%, выязджалі 3% з гэтых 6%. Таму казаць пра тое, што гэта будуць катастрафічныя наступствы, [не выпадае].

Уся наша феадальная сістэма кіравання створаная «ідэальна». Большая частка васалаў, сялян і халопаў у нашай феадальнай дзяржаве нікуды не тузалася. Таму катастрофы ў гэтым не будзе - мы будзем атрымліваць грошы праз карту «Мір», а прапаганда афіцыйна скажа: «Няма чаго катацца па свеце - у нас і ва Урупінску таксама нядрэнныя каньёны. А тое, што дарог няма, - лічыце, што гэта такое выдатнае падарожжа».

Для каго зараз гэта балюча - гэта, як ні здасца дзіўным, для тых, хто мае «празаходнія» погляды - вазьму ў двукоссі, таму што нічога празаходняга тут няма - у каго дзеці знаходзяцца ў замежных ВНУ, хто сам прыехаў у якасці ўцекача і мае расейскі пашпарт і расейскую карту. Ім давядзецца зараз прымаць вельмі хуткія дзеянні, і вельмі хацелася б, каб дакладна такія ж [дзеянні былі і] ад дзяржаўных машын за мяжой - тыя, хто выехаў з расейскімі пашпартамі, максімальна хутка маглі аформіць карты або як уцекачы, або яшчэ нейкія варыянты, якія іх легалізуюць з пункту гледжання грашовых рэсурсаў.

Бо калі казаць пра нейкую ўсвядомленую барацьбу за мір, то трэба не выкідваць з гэтай карціны свету якраз тых людзей, якія пацярпелі і выехалі зараз у якасці ўцекачоў за мяжу.

- А якія сферы бізнэсу пацерпяць больш ад сыходу Visa і Mastercard? Гэта ўсё, што звязана з падпіскамі?

- Я быў бы больш акуратны. Справа ўся ў тым, што асноўная [шкода] бізнэсу складаецца не ў тым, што гэтыя сэрвісы сыходзяць, а ў тым, што гэтыя сэрвісы, нагадаю, таксама працадаўцы. Цяпер вы ў мяне пытаецеся аб сыходзе кампаніі зусім у іншым кантэксце. Трэба пытацца: «А колькі застанецца без працы?» Таму што беспрацоўны - гэта спажывец. Зараз асноўны ўдар адбываецца за кошт таго, што расце схаванае беспрацоўе. Нашы феадальныя кіраўнікі робяць хітры фінт вушамі - яны прымушаюць усіх пакідаць у сябе на працы, каб усе лічыліся і беспрацоўе было неафіцыйнае.

Таму з гледзішча плацяжу ўсе пераходзяць на стары добры кэш. Карткі ўжывалі шмат у асноўным у двух цэнтральных «дзяржавах» – гэта ў Маскве і Санкт-Пецярбургу. Ва ўсіх астатніх «дзяржавах», якіх у нас амаль 15 усярэдзіне нашай краіны, карткі ўжываліся вельмі мала. У асноўным людзі, нават валодаючы заробкавымі праектамі, у першы ж дзень здымалі гатоўку, таму што да банкаўскай сістэмы як да вайсковай аперацыі не было даверу, так не засталося [і зараз]. Мы як знаходзіліся ў архаіцы - за кошт гэтага мы «выратаваны».