Тысячы пратэстоўцаў перад Белым домам патрабавалі засланіць неба над Украінай

Сярод іх - і беларусы.

Каля Белага дома прайшла маштабная акцыя за беспалётную зону над Украінай і ўзмацненне санкцый супраць Расеі, паведамляе "Укрінфарм".

На мітынг у Белы дом прыйшлі тысячы чалавек.

"На фоне разбуральных бамбаванняў цывільных тэрыторый, а таксама пагрозы ядзернага армагедона на Запарожскай АЭС з боку войскаў РФ украінская грамада і неабыякавыя хаўруснікі патрабуюць павялічыць дапамогу ЗША для Украіны", - заявілі арганізатары-мітынгоўцы - УККА, УНІС і United Help Ukraine.

Яны таксама звярнулі ўвагу на ўзмацненне гуманітарнага крызісу, які цяпер выходзіць за мяжу Украіны і распаўсюджваецца на іншыя еўрапейскія дзяржавы, што мае патрэбу ў неадкладным адказе.

Акцыя пад Белым домам стала працягам сэрыі маніфестацый, якія доўжацца ўжо другі тыдзень.

У нядзелю людзі выйшлі з плакатамі "Забяспечце беспалётную зону!", "Спыніце вайну ва Украіне!", "Засланіце наша неба!", "Падтрымайце Украіну!".