Міністр абароны Украіны паабяцаў Расіі «сюрпрыз»

У пастаўках зброі значны прагрэс.

Міністэрства абароны Украіны паведамляе аб значным прагрэсе ў пастаўках зброі з-за мяжы, што будзе "сюрпрызам" для расейцаў, піша "Украінская праўда" са спасылкай на словы кіраўніка Мінабароны Аляксея Рэзнікава:

- З-за вялізных страт, якія нясе супраціўнік, інтэнсіўнасць баявых дзеянняў часова знізілася. Аднак расейскія акупанты спрабуюць засяродзіць сілы і сродкі для новай хвалі нападаў.

Найперш - на Кіеў, Харкаў, Чарнігаў і Мікалаеў.

Мы выкарыстоўваем кожную хвіліну, каб умацаваць нашу абарону. Усе намаганні накіраваныя на забеспячэнне патрэб нашых абаронцаў.

Я не буду каментаваць пастаўкі зброі і боепрыпасаў - гэта далікатны момант. Няхай супраціўніка чакае сюрпрыз. Ведайце: ёсць значны прагрэс.

Акрамя таго, на працягу апошніх 3 дзён ужо дастаўлена больш за 50 тысяч шаломаў і бронекамізэлек.

Мы "перахапляем" у пастаўшчыкоў ужо пашытую форму для войскаў краін NАТО. Няхай наша абарона будзе адзетая па-рознаму.

Нашы ваяры на ўсіх кірунках абароны дэманструюць высокае майстэрства, разбураючы расейскіх захопнікаў.

Дзеянні нашай артылерыі ў Мікалаеўскай вобласці будуць у падручніках. Як і контратакі ўкраінскіх абаронцаў Харкава і Луганшчыны.

Мы працуем над атрыманнем дапамогі ў галіне ПРА і СПА. Але давер да непазбежнасці нашай перамогі дадаюць не абяцанні, а ВПС Украіны. І асобныя мэнэджары "Укрпошты", якія збіваюць самалёт з расейскімі вайскоўцамі.