Украіна прапанавала РФ абмяняць абаронцаў з «Азоўсталі» на палонных акупантаў
10- 11.05.2022, 21:50
- 7,868
Кіеў прапрацоўвае розныя варыянты выратавання ўкраінскіх вайскоўцаў.
Украінскі ўрад распрацаваў новую прапанову ў выратаванні вайскоўцаў, якія знаходзяцца на тэрыторыі завода «Азоўсталь». Іх плануюць абмяняць на палонных расейскіх жаўнераў.
Пра гэта паведамляе РБК-Украина са спасылкай на міністарку ў пытаннях рэінтэграцыі часова акупаваных тэрыторый Ірыны Верашчук.
«У якасці першага кроку, прапанавалі расейцам такі абмен: мы вывозім нашых цяжкапараненых хлопцаў з «Азоўсталі» па гуманітарным калідоры. У той жа час аддаём палонных расейцаў па стандартных правілах абмену ваеннапалонных», - расказала міністарка.
Яна падкрэсліла, што ўрад у гэты момант прапрацоўвае розныя варыянты выратавання ўкраінскіх вайскоўцаў.
«Ніводны з іх не ідэальны. Але мы шукаем не ідэальны варыянт, а працоўны», - заявіла міністарка.
Варта заўважыць, што завод «Азоўсталь» знаходзіцца ў атачэнні расейскіх войскаў. Украінскія вайскоўцы трымаюць абарону нягледзячы на большыя ў некалькі разоў сілы ворага.