Жыхар Рэчыцы, абвінавачаны ў зверствах ва Украіне, раней лічыўся найлепшым «аператыўнікам» раёна

Нечакана ён звольніўся з «органаў» і пайшоў працаваць у таксісты.

Былы жыхар Рэчыцы Сяргей Сазанаў, які ваяваў у складзе ПВК «Вагнер» у Сірыі, падазраецца ў катаваннях і расстрэлах мірных жыхароў ва Украіне. «Флагшток» распавёў, што вядома пра абвінавачанага.

Сяргей Сазанаў у публікацыі газеты «Дняпровец» ад 16 верасня 2010 года

Паводле звестак праекта «Міратворац», 49-гадовы Сяргей Сазанаў у званні маёра працаваў участковым інспектарам Рэчыцкага РАУС. У 2015 годзе яго нібыта аштрафавалі за спажыванне наркотыкаў на 14 мільёнаў беларускіх рублёў. Журналісты паразмаўлялі з чалавекам, які добра ведаў Сазанава.

Са слоў суразмоўцы, Сяргей Сазанаў быў фізічна добра развіты, займаўся спортам, у міліцыі быў на добрым рахунку.

«Будучы начальнікам ППС, ён прымудраўся неаднаразова затрымліваць парушальнікаў. Ён то кішэнніка затрымае на рынку, то дамушніка падчас рабавання зловіць. Магчыма, гэтаму спрыяла добрае веданне мясцовага кантынгенту. Напрыклад, пасля кватэрнага крадзяжу яшчэ толькі распачыналася крымінальная справа, а ён ужо прымудраўся затрымліваць падазраванага. У міліцыі на яго нават злаваліся за гэта, уважаючы, што ён лезе не туды куды трэба».

Сяргей Сазанаў у публікацыі газеты «Дняпровец» ад 14 сакавіка 1998 года.

Пасля 17 гадоў працы ў органах унутраных спраў Сяргей Сазанаў нечакана звольніўся з міліцыі і пайшоў працаваць таксістам.

«З яго пасадай звычайна сыходзяць да нафтавікоў у ахову ці на іншыя пасады, дзе не трэба моцна напружвацца, але заробак нармальны. Але ён пачаў аказваць паслугі таксі на сваім аўтамабілі. Прычым падчас паездкі ў яго ў машыне можна было атрымаць юрыдычную кансультацыю, скарыстацца паслугамі перакладчыка».

Суразмоўца пацвердзіў, што Сяргей Сазанаў быў аштрафаваны і пазбаўлены правоў за спажыванне наркотыкаў.

«Магчыма, чымсьці ён не дагадзіў былому кіраўніцтву, бо за яго ўзяліся. Наказ быў пасведчання кіроўцы яго пазбавіць і ўсяго іншага. Аднойчы раніцай яго спынілі супрацоўнікі ДАІ, якія яго добра ведалі, і павезлі на агляд у бальніцу. Пры гэтым ні паху, ні іншых сімптомаў ап'янення ў яго не было. У крыві ў яго знайшлі рэшткі наркатычных сродкаў. Сяргей Сазанаў праз суд спрабаваў давесці, што гэта не наркотыкі, а сляды прыёму карвалолу, у складзе якога ёсць гэтыя элементы. Аднак вярнуць сваё пасведчанне так і не здолеў».

У мачы Сазанава былі знойдзены сляды барбітуравай кіслаты, вытворныя якой з'яўляюцца наркотыкамі. На падставе выніку аналізу начальнікам рэчыцкай ДАІ была вынесеная пастанова аб пазбаўленні мужчыны пасведчання кіроўцы тэрмінам на тры гады і выпісаны штраф сумаю 14 млн рублёў.

У пошуках праўды Сазанаў звярнуўся ва ўпраўленне аховы здароўя, якое прызнала, што ў выснове, зробленай УАЗ «Рэчыцкая ЦРБ», адсутнічае апісанне клінічнай карціны стану, выкліканага спажываннем наркатычных сродкаў.

Праверка, праведзеная ўпраўленнем аховы здароўя, паказала, што выснова, вынесеная паводле вынікаў медычнага агляду Сазанава не адпавядае патрабаванням, фота TUT.BY

Нягледзячы на тое, што лекары сталі на бок Сазанава, яго ўсё роўна пазбавілі пасведчання кіроўцы.

«Па сутнасці яго пазбавілі заробку. Хто яго мог узяць на працу? У маленькім мястэчку, калі пасварыўся з начальнікам міліцыі, то шлях будзе ўсюды закрыты. Ён з'ехаў, і неўзабаве з'явіліся першыя публікацыі аб тым, што ён нібыта складаецца ў ПВК Вагнера, але падрабязнасцяў не было. Не ведаю, распачыналі на яго справу ці не, але ён у гэты час прыязджаў сюды і свабодна перамяшчаўся па горадзе. Таму я думаю, што ў вышуку ён не быў».

Незвычайных схільнасцей за Сяргеем Сазанавым суразмоўца не заўважаў.

«Ён не быў адмарожаны, наадварот разважлівы, таварыскі. У міліцыі ёсць такія, якія ходзяць кампаніямі па карчмах, дзе непрыстойна сябе паводзяць, б'юцца, не расплачваюцца. Ён быў не з такіх. Не было такога, каб на допытах некага біў. Таму да яго мясцовыя нармальна ставіліся, ён хадзіў па горадзе, не азіраючыся. У мяне дагэтуль ёсць сумневы, што ён тварыў нешта «чорнае», катаваў, забіваў. Але што робіцца ў мозгу ў іншага чалавека, зразумець да канца складана».