Ці абвесцяць Беларусі дэфолт?

Далей беларускім уладам давядзецца разлічваць толькі на Расею, у якой і так стае праблем.

Урад Беларусі праз раней уведзеныя заходнія санкцыі заявіў, што будзе выконваць даўгавыя абавязанні ў еўрааблігацыях у беларускіх рублях. Паведамляецца, што праз абмежаванні ўладальнікі каштоўных папер не даатрымліваюць прыбытак, адпраўлены з Беларусі.

"Гэта мера вымушаная і абумоўлена немагчымасцю аплатнага агента і іншых удзельнікаў міжнароднай разлікова-клірынгавай сістэмы гарантаваць паўнату і своечасовасць пералічэння сродкаў усім трымальнікам еўрааблігацый", - падкрэслілі ва ўрадзе.

Міністр фінансаў Юрый Селіверстаў заявіў, што калі рушаць следам спробы абвясціць краіне дэфолт, то яны толькі пацвердзяць намеры Захаду «у свядомым штучным абгульванні дэфолту».

Udf.by пацікавіўся, якія наступствы будзе мець пастанова ўрада?

«Мы і так ужо акружаныя парканам ад астатняга свету»

Былы кіраўнік Нацбанка Станіслаў Багданкевіч зазначыў, што нават калі здарыцца дэфолт, гэта мала што зменіць.

«Фактычная пастанова ўрада - гэта дэфолт. Напэўна, ён будзе абвешчаны ў дачыненні да Беларусі. Але паколькі праз санкцыі на Захадзе крэдыты Беларусі і так не даюць (ні МВФ, ні Еўрапейскі банк рэканструкцыі і развіцця, ні камерцыйныя банкі), то фактычна дэфолт нічога не зменіць. Мы і так ужо акружаны парканам ад астатняга свету», - сказаў Багданкевіч.

Далей беларускім уладам давядзецца разлічваць толькі на крэдыты Расеі.

«Што азначае дэфолт? Не варта мець справу з краінай, не варта ўкладваць у яе капітал, не варта пастаўляць тавары без папярэдняй аплаты», - патлумачыў Багданкевіч.

Экс-кіраўнік Нацбанка звярнуў увагу на цікавы момант:

«Сёння Беларусь прапануе ўласнікам каштоўных папер датэрмінова выкупіць іх. Яны ўпалі ў кошце і каштуюць менш за 20% ад намінальнага кошту».

Але дэфолт негатыўна паўплывае на беларускую эканоміку ў будучыні.

«Фактычна, сёння дэфолт будзе для Беларусі звязаны толькі з іміджам. Ён больш б'е па ўсведамленні, падрывае імідж і давер да краіны на будучыню. Калі стасункі з заходнім светам будуць нармалізоўвацца, элементы недаверу да Беларусі застануцца. Хаця Аргентына 9 разоў была ў стане дэфолту, але жыве і далей», – сказаў Багданкевіч.